Innlent

Er framlag Íslands í Eurovision stolið?

Haukur Viðar Alfreðsson skrifar
Magnús segir ásakanir um lagastuld í söngvakeppninni vera fasta liði eins og venjulega.
Magnús segir ásakanir um lagastuld í söngvakeppninni vera fasta liði eins og venjulega.
„Lag sem samið er í hefðbundnum þjóðlagastíl, svo ég tali nú ekki um þegar það er í stíl sem er jafn margreyndur og hinn keltneski, og lagið heldur fast í hönd hins hefðbundna, þá er náttúrulega voðinn vís," segir hljómlistarmaðurinn Magnús Kjartansson í kjölfar umræðu um að framlag Íslendinga til Eurovision sé stolið lag.

Síðan lag þeirra Örlygs Smára og Péturs Arnar Guðmundssonar, Ég á líf, var frumflutt hafa netverjar verið duglegir við að benda á líkindi þess með lagi kanadíska gríntríósins The Arrogant Worms, I Am Cow. Eftir að Ég á líf, sem söngvarinn Eyþór Ingi Gunnlaugsson flytur, vann úrslitakvöld undankeppninnar í gærkvöldi náðu I Am Cow-færslur netverja algjöru hámarki.

„Við þekkjum þetta keltneska og írska. Við þekkjum umræðuna um Söknuð og Danny Boy. Ísland kýs lag núna í Eurovision sem sækir algjörlega í þennan brunn og heldur fast í hefðir sem eru aldagamlar, og þá kvikna auðvitað rauð ljós alls staðar."

Magnús, sem var formaður STEF um áraskeið, segir umræðuna nánast alltaf koma upp varðandi eitthvert keppnislandanna, en mismikið þó. „Þetta held ég að falli undir liðinn Fastir liðir eins og venjulega, en það er alltaf leiðinlegt að vera landið sem fær þetta umtal."

Eigum að upphefja frumleikann

Magnús treystir sér ekki til að fullyrða hvort Evrópa taki undir með íslenskum netverjum og muni telja lagið stolið. „Ég er ekki spámaður, en í keppni þá er hættan alltaf sú að ef hægt er að níða niður keppinautinn, að það verði gert," segir Magnús, en hann virðist þó setja ákveðin spurningamerki við framlagið.

„Ég held að það hljóti að vera draumur Íslands og Íslendinga að við vekjum athygli vegna þess að við erum öðruvísi. Ekki vegna þess að við erum eins, og eitthvað sem er þegar til. Við erum að fagna árangri á tónlistarsviðinu um víða veröld fyrir okkar frumleika en ekki fyrir eftirhermuskap. Þess vegna er það leiðinlegt ef svo færi að við fengjum síðan umtal um hið gagnstæða."

En telur Magnús lag Íslands eiga möguleika á að komast alla leið á úrslitakvöld Eurovision?

„Ef það gerist þá verður það fyrir mikla persónutöfra frábærs söngvara sem er óvenju vandvirkur og trúr sínu. Það er hægt að fara langt á því líka. Ég velti því samt fyrir mér af hverju okkar vönustu, flinkustu, reyndustu, sniðugustu og afkastamestu dægurlagahöfundar taka ekki þátt í keppninni. Þú heyrir aldrei af þeim nema í sambandi við Eurovisionkeppnina. Þetta eru Eurovision-hobbýistar. Það hlýtur að vera svolítið stór spurning hvers vegna Ríkisútvarpið skapar ekki skilyrði til þess að þeir höfundar sem ég taldi upp með þessum forskeytum, taki ekki þátt."

Þá gagnrýnir Magnús keppnina fyrir að hafa fagfélög hljómlistarmanna og höfunda ekki meira með í ráðum. „Myndi vera haldin arkitektakeppni án samráðs við félag arkitekta? Þetta er kannski samningslega, lögfræðilega og stjórnmálalega einkamál ríkisútvarpsstöðva hvers lands fyrir sig, en mér er til efs að það sé minna samband haft við fagaðila heldur en á Íslandi."


Tengdar fréttir

Eyþór Ingi vann - Fer til Malmö í maí

Eyþór Ingi mun flytja lagið Ég á líf fyrir Íslands hönd í Eurovision í maí. Hann er jafnframt sigurvegari Söngvakeppni sjónvarpsins í ár, en úrslitin voru gerð kunn í kvöld. Lag og texti, Ég á líf, er eftir Örlyg Smára og Pétur Örn Guðmundsson.

Ég á líf og Ég syng keppa til úrslita

Tvö lög, lögin Ég á líf og Ég syng, keppa um sigurinn í Söngvakeppni Sjónvarpsins í kvöld. Þetta varð ljóst þegar fyrri atkvæðagreiðslu lauk í kvöld. Það lag sem vinnur verður fulltrúi Íslands í Eurovision í Malmö í Svíþjóð í maí. Sigurvegarinn verður kjörinn í síðari atkvæðagreiðslu í kvöld.

Húrrandi hamingja í Hörpu

Meðfylgjandi myndir tók Valgarður Gíslason ljósmyndari í Hörpu í gærkvöldi þegar ljóst var að tvö lög, lögin Ég á líf og Ég syng, kepptu um sigurinn í Söngvakeppni Sjónvarpsins.




Fleiri fréttir

Sjá meira


×