Innlent

Farþegar óttuðust slagsmál yfir miðju Atlantshafi

Jóhanna Margrét Gísladóttir skrifar

Farþegar um borð í flugvél Icelandair á leið til New York í gærkvöldi voru mjög skelkaðir þegar ofurölvaður íslenskur maður fór að áreita fólk í kringum sig. Þeir hjálpuðu áhöfn flugvélarinnar að yfirbuga manninn sem sat tjóðraður við sæti sitt meirihluta flugsins. Einn sjónarvotta segist hafa óttast að til slagsmála kæmi yfir miðju atlantshafi.

Flugvél Icelandair lagði af stað til New York síðdegis í gær. Eftir um tveggja klukkustunda flug fóru farþegar að taka eftir manni sem hagaði sér undarlega í næstu sætaröð.

„Það sást til hans þar sem hann reyndi að taka gleraugun af konu. Hann sat fyrst við hlið tveggja kvenna og ég sá hann snerta andlit þeirra og kasta koddum í þær," segir Bradley McGarth, sem var í flugvélinni.

Konurnar skiptu stuttu síðar um sæti við tvo karla sem sátu í sætaröðinni fyrir framan þær en maðurinn, sem er íslendingur á fimmtugsaldri, hélt hins vegar ólætunum áfram.

„Hann drakk áfengi í óhófi og svo virtist sem hann væri að reyna að stofna til illinda við mennina sem hann sat hjá. Hann stóð oft upp, fór á snyrtinguna, var óstöðugur á fótunum, rakst á aðra farþega og hrasaði á leið sinni til og frá sætinu. Hann raskaði oft ró fólksins um borð. En dropinn sem fyllti mælinn var þegar hann fór að áreita sessunaut sinn. Það var þá sem farþegar í grenndinni fjötruðu hann þar sem hann var farinn að meiða sessunaut sinn," segir Bradley.

Hann segir að það hafi tekið svolitla stund að yfirbuga manninn þar sem hann lét öllum illum látum.

„Einhver kom með límband því hann öskraði. Ég tala ekki íslensku en hann öskraði mikið. Síðan hrækti hann á flugfreyjuna og nærstadda farþega sem voru að reyna að hemja hann. Þess vegna var límt fyrir munninn á honum," segir Bradley.

Hann segist hafa verið frekar skelkaður þegar maðurinn lét hvað verst.

„Ég var aðallega skelkaður því við áttum svo langt eftir. Það var enn 4 tíma flug til New York. Þegar ég leit á kortið sem lýsir fluginu sá ég að við vorum yfir úthafinu. Hvað myndi gerast ef hann skaðaði einhvern?" segir Bradley.

Hann segist vilja hrósa flugfreyjunum um borð fyrir þeirra viðbrögð.

„Þær stóðu sig mjög vel við erfiðar aðstæður. Þær leystu hratt og vel úr vanda sem hefði getað orðið skelfilegur. Ég býst við að slíkt geti gerst alls staðar," segir Bradley.

Þegar vélin lenti fjórum klukkustundum síðar í New York komu lögreglumenn um borð og ræddu við sjónarvotta í sætunum í kringum manninn og að lokum var hann leiddur síðastur frá borði og í varðhald.

„Þegar hann kom í land rannsakaði lögreglan málið og vísaði því til saksóknara á staðnum. Niðurstaða hans var að sækja manninn ekki til saka. Hann var því aldrei kærður fyrir glæp," segir Ron Marsico, upplýsingafulltrúi á JFK flugvellinum.

Maðurinn var því næst sendur á spítala þar sem hann gat sofið úr sér en hefur ekki verið kærður fyrir hegðun sína. Guðjón Arngrímsson upplýsingafulltrúi Icelandair segir félagið sé að skoða málið með tilliti til hvort leggja eigi fram kæru á hendur manninum vegna ógnandi tilburða hans. Hann segir atvik sem þessi hafa komið upp en þetta sé líklega það alvarlegasta sem hann man eftir hvað varðar hegðun farþega.


Tengdar fréttir

Farþegum brugðið þegar flugdólgurinn var handtekinn

Fólki í vél Icelandair, sem flaug frá Íslandi til New York í gær, var mjög brugðið eftir að flugdólgur var handtekinn í vélinni. Maðurinn hafði verið með allmikil læti þegar hann var loks yfirbugaður af áhöfn vélarinnar og farþegum.

Flugdólgurinn gæti átt yfir höfði sér fangelsisdóm

Maður sem var tjóðraður niður vegna óláta um borð í flugvél Icelandair á leið til New York í Bandaríkjunum í gær gæti átt yfir höfði sér háa fjársekt og jafnvel fangelsi í Bandaríkjunum. Hann á líka á hættu að vera meinað um að koma þangað aftur, sagði í fréttum Bylgjunnar klukkan 2. Maðurinn er íslenskur.

Flugdólgur yfirbugaður af farþegum hjá Icelandair

Karlmaður var yfirbugaður af farþegum og áhöfn flugvélar Icelandair sem var á leiðinni til New York. Mynd af manninum hefur vakið heimsathygli en þar sést að hann hefur hreinlega verið límdur við sæti sitt.

Flugdólgurinn sendur á spítala

Íslenski flugdólgurinn sem var reyrður niður í sætið sitt þegar hann flaug með vél Icelandair til New York í gærkvöldi, var sendur á spítala eftir skýrslutöku. Samkvæmt upplýsingafulltrúa á JFK flugvellinum, Ron Marsico, var tekin skýrsla af dólginum eftir að hann lenti á flugvellinum í nótt. Þá þegar varð ljóst að maðurinn var svo drukkinn að það þótti réttast að senda hann á spítala.

Sjónarvottur fullyrðir að dólgurinn hafi verið íslenskur

Sjónarvottur fullyrðir að maðurinn sem var yfirbugaður í flugvél Icelandair í gærkvöldi, hafi verið íslenskur. Sá var hér á landi um áramótin ásamt félögum sínum, en vinur hans, sá sem tók myndina sem fer eins og eldur um sinu á netinu - og er meðal annars ein sú vinsælasta á reddit.com núna - segir að hann hafi verið raunverulega hræddur við manninn.




Fleiri fréttir

Sjá meira