Innlent

Frakkar gefa út Sólkross og vilja kvikmynda bókina

ánægður Prisma Media hefur tryggt sér útgáfuréttinn á bók Óttars M. Norðfjörð, Sólkross.mynd/Elo Vázques
ánægður Prisma Media hefur tryggt sér útgáfuréttinn á bók Óttars M. Norðfjörð, Sólkross.mynd/Elo Vázques

„Prisma er risastórt í Frakklandi og þar að auki í eigu Bertelsmann, eins stærsta útgáfurisa heims, svo þetta er gríðarleg viðurkenning fyrir mig og býður upp á mikil tækifæri fyrir bókina, sem og aðrar bækur, en Prisma hefur nú þegar augastað á öðrum titlum eftir mig," segir rithöfundurinn Óttar M. Norðfjörð.

Franski fjölmiðlarisinn Prisma Media hefur keypt útgáfuréttinn á Sólkrossi eftir Óttar og fyrirhugar að gefa hana út í marslok á næsta ári, á sama tíma og bókmenntahátíðin í París stendur yfir. Sólkross, sem kom út á Íslandi árið 2008, er sagnfræðileg spennusaga sem sækir í víkingafortíð Íslendinga og er hún fyrsta bók Óttars sem kemur út í Frakklandi.

„Ég er þess vegna mjög glaður og spenntur yfir að eignast loksins franska lesendur. Hún kemur út í tengslum við stærstu bókmenntahátíð Frakklands svo það væri draumur að komast þangað."

Prisma er næststærsta útgáfufyrirtæki Frakklands á sviði tímarita en annast einnig bókaútgáfu. Í fyrra seldi það 220 milljónir eintaka af tímaritum sínum í Frakklandi. Prisma er í eigu alþjóðlega fjölmiðlaveldisins Bertelsmann. Fyrirtækið ætlar að fara af stað með glæpasagnaseríuna Prisma Noir þar sem kynntar verða fyrir lesendum bækur sem gerast á fjarlægum slóðum og var Sólkross valin til kynningar á Íslandi. Prisma Media hyggst jafnframt búa til sjónvarpsauglýsingu byggða á bókinni þar sem íslensk náttúra fær að njóta sín.

Sólkross hefur komið út í yfir tuttugu löndum. Bókin hefur selst í yfir tíu þúsund eintökum í Þýskalandi, Sviss og Austurríki en hér heima hefur hún selst í nokkur þúsund eintökum.

Í haust er væntanleg ný bók eftir Óttar, draugasagan Spor skugganna, hjá Sögum útgáfu. „Spor skugganna dansar á mörkum spennusögu og draugasögu," segir Óttar, spurður út í bókina. „Hún fjallar um unga konu sem hefur misst son sinn en hún neitar að trúa því að hann sé látinn. Þegar hún fer að leita drengsins taka undarlegir hlutir að koma fyrir hana."

freyr@frettabladid.is




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.