Lífið

Myndaði Eiffel-turninn í polli

Ljósmynd af Eiffel-turninum eftir Oscar Bjarnason prýðir nýja ljósmyndabók.
Ljósmynd af Eiffel-turninum eftir Oscar Bjarnason prýðir nýja ljósmyndabók.
Grafíski hönnuðurinn og áhugaljósmyndarinn Oscar Bjarnason á ljósmynd í bókinni 200 Best Ad Photographers sem hið virta þýska tímarit Lürzer's Archive gefur út á tveggja ára fresti.

„Það kom mér mest á óvart að fá boð um að vera með í bókinni," segir Oscar. „Fyrst ætlaði ég að sleppa því en svo ákvað ég að prófa og sjá hvað myndi gerast."

Hann sér ekki eftir því enda komust tvær myndir eftir Oscar í gegn hjá dómnefndinni af rúmlega tíu þúsund sem voru sendar inn af 860 ljósmyndurum frá 56 löndum. Oscar ákvað að taka aðra þeirra út þar sem honum fannst hún ekki nógu lýsandi fyrir sig. Hin myndin, sem var tekin af Eiffel-turninum í París fyrir tveimur árum, er í bókinni ásamt um 500 öðrum myndum.

„Við vorum að labba þarna, ég og unnustan, niður götuna og ég sá fínan poll þarna og smellti," segir hann um myndina.

Oscar er einnig frímerkjahönnuður hjá Íslandspósti. Fyrirtækið vantaði myndir fyrir ferðamannafrímerki og voru myndir sem Oscar tók í Landmannalaugum notaðar á þau. Aðspurður segir hann ljósmyndun vera fína tilbreytingu frá starfi sínu sem grafískur hönnuður en á þeim vettvangi hefur hann unnið til ýmissa verðlauna.

Oscar Bjarnason.mynd/christopher lund
„Þetta er áhugamál sem byrjaði fyrir einhverjum þremur árum síðan og er alveg stórskemmtilegt. Maður kemst út úr húsi og það er ekki bara setið og horft á skjáinn allan daginn."

Fleiri myndir eftir Oscar má finna á slóðinni Oscarbjarna.photoshelter.com/oscarbjarna. -fb






Fleiri fréttir

Sjá meira


×