Innlent

Pólfarar hittust á aðfangadag - Vilborg Arna búin að ganga 700 kílómetra

Karen Kjartansdóttir skrifar

Vilborg Arna Gissurardóttir sem stödd er á suðurskautslandinu segist miða vel áfram. Hún tók fram úr öðrum pólfara á aðfangadagkvöld og segir það hafa verið sérstæða reynslu að rekast á aðra manneskju á Suðurskautslandinu.

Vilborg Arna Gissurardóttir lagði af stað á Suðurpólinn 2. nóvember en ferðina hafði hún undirbúið í nokkur ár. Hún á nú eftir um það bil einn þriðja leiðarinnar og býst við því að verða komin á leiðarenda eftir um það bil tvær vikur, færið sé gott og hún komist hratt yfir um þessar mundir. Vilborg verður þá níunda konan í heiminum til að ljúka þessari leið og fyrsta íslenska konan.

Sp. blm. En er álagið og einsemdin ekki farin að segja til sín?

„Auðvitað er ég orðin svolítið þreytt en samt ótrúlega hress," segir Vilborg. „Ég er búin að ganga yfir 700 km án þess að hvíla mig og einhvern veginn hefur þetta gengið ótrúlega vel. Einsemdin hefur haft minni áhrif á mig en ég hélt. Ég hef fengið margar kveðjur og líður heilt yfir alveg ótrúlega vel."

Þá átti Vilborg Arna stutt samtal við annað pólfara á aðfangadagskvöld.

„Það er bandarískur maður sem heitir Aron sem er að skíða þessa sömu leið og ég. Honum hefur gengið upp og ofan, lent í vandræðum með búnaðinn sinn og svona. Ég var ekki að reyna ná honum, þvert á móti, ég vonaði að hann kæmist á undan mér á pólinn."

„Á aðfangadagskvöld fór það samt þannig að ég náði honum og heilsaði upp á hann í tjaldinu. Við áttum stutt spjall saman enda höfum við um margt að tala. En nú er ég sem sagt komin fram úr honum en vona að hann komist á pólinn í tæka tíð."

Meðan á göngunni stendur safnar Vilborg Arna áheitum til styrktar Lífi styrktarfélagi kvennadeildar Landspítalans sett sig í spor Vilborgar með því að lesa blogg hennar á síðunni lifsspor.is og heitið á hana með því að hringja í síma 908-1515 og stutt hana þar með um 1.500 krónur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira