Innlent

Akranes íhugar málssókn gegn Fréttatímanum

Árni Múli Jónasson, bæjarstjóri Akranesbæjar.
Árni Múli Jónasson, bæjarstjóri Akranesbæjar.
Bæjarstjóri Akranesbæjar hefur falið lögmanni bæjarfélagsins að meta hvort ritdómur Fréttatímans um ritið Sögu Akraness varði við lög. „Þeir sem gefa út og skrifa ritdóma og ætlast til þess að hlustað er á þá verða auðvitað að skilja að þeir geta haft hrikalegar afleiðingar með ábyrgðarlausu tali. Að þjófkenna menn og segja að þeir séu að ásetningi að falsa sögu eru býsna alvarlegar ásakanir," segir Árni Múli Jónasson, bæjarstjóri Akranesbæjar, í samtali við Vísi.

Í ritdómi sem birtist í síðasta tölublaði Fréttatímans er með hörðum hætti fjallað um Sögu Akraness sem nýverið kom út í tveimur bindum. Í dómnum er fyrra bindið tekið fyrir. Verkið var umdeilt þar sem ritun þess stóð yfir í fjölmörg ár og kostaði bæjarfélagið hátt í 100 milljónir.

Merkilegur minnisvarði

Í ritdómnum sem Páll Baldvin Baldvinsson skrifaði segir að bókin sé sönnunargagn um lágt siðferðisstig í bókaútgáfu. Ennfremur segir hann í lokaorðum: „Saga Akraness Fyrsta bindi er merkilegur minnisvarði um vanhugsaðan undirbúning, óvandaða vinnu og óvandaða tilraun til að smíða sögukenningu sem ekki er fótur fyrir."

Árni Múli er allt annað en sáttur með ritdóminn. Vegið sé að fræðimanninum, útgefanda verksins og bæjarfélaginu. „Þetta eru ærumeiðingar sem menn verða að bera ábyrgð á."

Fullyrðingar sem settar séu fram í skrifum Fréttatímans gefi fullt tilefni til að skoða málið frekar. Hann segir úttektina ekki vera fræðilega en sé þess í stað ekkert annað en skítkast og upphrópanir. „Mér til efs a þessi ritdómur byggi á mikilli skoðun á þessum bókum."

Menn mega hafa sínar skoðanir

Árni Múli segist ekki geta setið undir því þegar vegið sé að æru fólks sem starfi í þágu bæjarfélagsins. Menn geti síðan haft allar sínar skoðanir hvernig halda eigi utan um verkefni eins og þetta og kostnaðinn við það. Hann segir að það hafi þó ekkert um það að segja hvort ritið sé gott eða vont.

„Þeir sem hafa helst tjáð sig um það virðast blanda þessu öllu saman því þeim langar svo mikið til þess að geta sýnt fram á að það hafi ekki einungis verið illa utan um þetta haldið og þetta hafi kostað mikið heldur sé niðurstaðan drasl."

Góð rit

Árni Múli hvetur fólk til að kynna sér og skoða Sögu Akraness og leggja sjálft mat á verkið. Að hans mati er það flott og skemmtilegt. „Ég er sannfærður um að þetta séu býsna góð rit."


Tengdar fréttir

Saga Akraness tilbúin eftir áratugarskrif

Gunnlaugur Haraldsson þjóðháttafræðingur mun í dag afhenda Árna Múla Jónassyni, bæjarstjóra á Akranesi, handrit fyrstu tveggja binda Sögu Akraness við athöfn sem fram fer í Kirkjuhvoli og hefst klukkan fimm.

Saga Akraness sögð tært bull

„Helstu niðurstöður mínar eru að meðferð heimilda er mjög ábótavant, myndir eru oft rangt merktar eða notaðar í heimildaleysi, umfjöllun um landnámsmenn eru studdar vægast sagt hæpnum rökum og niðurstaðan er, að mínu mati, tært bull,“ segir Harpa Hreinsdóttir, kennara í Fjölbrautaskóla Vesturlands, um fyrstu tvö bindin af Sögu Akraness sem kom út fyrir á árinu.

Vill lögreglurannsókn á vondum bókarskrifum

Bókin Saga Akraness, 1. bindi, fær vægast sagt skelfilega útreið í bókargagnrýni Páls Baldvins Baldvinssonar í Fréttatímanum í dag. Bókin hefur hingað til verið þekktust fyrir það að vera dýr í útgáfu en hún kostaði yfir 100 milljónir króna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×