Viðskipti innlent

Gera ekki kröfu um að Þorsteinn eigi Vífilfell áfram

Þorbjörn Þórðarson skrifar

Vífilfell missir ekki leyfi til að tappa á og selja kók þótt Arion banki taki rekstur fyrirtækisins yfir, þvert á það sem áður hefur komið fram. Vífilfell og félög í eigu Þorsteins M. Jónssonar skulda Arion banka ellefu milljarða króna.

Samkvæmt lánayfirliti Kaupþings banka frá 25. september 2008 skulduðu Vífilfell og félög í eigu Þorsteins M. Jónssonar Kaupþingi, nú Arion Banka, alls 73 milljónir evra, eða jafnvirði rúmlega ellefu milljarða króna. Þar af voru skuldir tveggja félaga Þorsteins, Sólstafa ehf. og Stuðlaháls ehf. alls 57 milljónir evra, eða jafnvirði um níu milljarða króna.

Tryggingar fyrir þessum skuldum eru m.a hlutabréf í Vífilfelli sem er með átöppunar- og dreifingarleyfi fyrir kók og aðra gosdrykki frá Coca Cola Company. Fyrirtækið er í raun eins og eilífðarmjólkurkú því Íslendingar elska kók en velta fyrirtækisins er sex milljarðar á ári.

Vífillfell á fasteignir við Stuðlaháls, vélar og tæki, en auk þess á félagið 5 prósent eignarhlut í evrópska drykkjarframleiðandanum Refresco.
Miðað við það verð sem fjárfestingarfélagið 3i greiddi fyrir 20 prósent hlut í Refresco er þessi hlutur Vífilfells metinn á 21 milljón evra, eða um 3,3 milljarða króna, en í mars á þessu ári keypti fjárfestingafélagið 3i 20 prósent hlut í Refresco á 84 milljónir evra.

Skuldir félaga Þorsteins íþyngja þeim mjög. Fréttastofa RÚV greindi frá því í október á síðasta ári að fulltrúi Coca Cola á Norðurlöndunum hefði sagt Kaupþingi að ef gengið yrði að veðum í Vífilfelli myndi Coca Cola svipta fyrirtækið leyfi til að tappa á flöskur. Þetta virðist ekki vera raunin því Coca Cola Europe virðist ekki hafa áhyggjur af því hver á Vífilfell.

Viðskiptablaðið greindi frá því í síðustu viku að Coca Cola Europe væri ekki mótfallið yfirtöku á Vífilfelli. Fréttastofa Stöðvar 2 hafði samband við Joel Morris, talsmann Coca Cola Europe, og sagði hann í svari við skriflegri fyrirspurn fréttastofu: „Við höfum aðeins eitt markmið og það er að halda áfram að veita íslenskum neytendum vörur sem þeir njóta." Morris segir að fyrirtækið muni geri það sem sé nauðsynlegt til að ná þessu markmiði. Eignarhald er því í raun ekki fyrirstaða ef Arion banki hefur í hyggju að taka Vífilfell yfir en látið hefur verið í veðri vaka að bankinn geti ekki gengið að tryggingum sínum vegna skilyrða Coca Cola sem vilji ekki aðra en Þorstein við stjórnvölinn í fyrirtækinu, eins og greint er frá framar.

Þorsteinn M. Jónsson vildi ekkert tjá sig um málið þegar fréttastofa náði sambandi við hann í dag. Hann vildi ekki svara spurningum um hvort eignarhaldsfélögin Sólstafir ehf. og Stuðlaháls ehf. hefðu staðið í skilum með sín lán.

Áður en Þorsteinn eignaðist Vífilfell og varð stjórnarformaður félagsins var hann forstjóri þess í tíð eldri eiganda. Hann fjármagnaði kaup sín á félaginu að fullu með lánum frá Kaupþingi banka.

Í skýrslu rannsóknarnefndar Alþingis ræðir Styrmir Gunnarsson, fyrrverandi ritstjóri Morgunblaðsins, um kaup Þorsteins á fyrirtækinu en í vitnisburði sínum fyrir rannsóknarnefndinni segir Styrmir og vitnar til samtals sem þeir tveir áttu: „Ég sagði við hann: Þorsteinn, ég veit að þú átt enga peninga, geturðu útskýrt fyrir mér hvernig þú getur keypt Vífilfell? Og hann horfði á mig, brosti, og ég gleymi aldrei orðalaginu: Með þróaðri fjármálatækni."







Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ICEAIR
1,8
6
20.349
MARL
1,32
4
79.593
HAGA
0,74
3
141.155
N1
0,41
5
190.896
EIK
0,26
3
34.958

Mesta lækkun dagsins


Félag
Br.%
Fjöldi
Velta*
GRND
-0,98
2
15.300
EIM
-0,73
4
23.410
SIMINN
0
4
20.348
SKEL
0
4
16.241
HEIMA
0
1
220
Velkomin á Vísi. Þessi vefur notar vafrakökur. Sjá nánar.