Innlent

Gillz: „Ég elska konur og hef alltaf gert - mamma mín er kona!“

Valur Grettisson. skrifar
Egill Gillzenegger.
Egill Gillzenegger.

„Daginn eftir tók ég færsluna út og baðst afsökunar enda grófur einkahúmor þarna á ferð. Það mál var afgreitt þá og skil ekki tilganginn að vera að rifja þetta upp núna. Mér er líka gróflega misboðið að þessar konur skuli segja að ég hafi verið að hvetja til nauðgana. Að þær skuli lesa það út úr þessum vitleysisgangi er út hött og í raun ekki svaravert," segir Egill Einarsson, oft kallaður Gillzenegger.

Ástæðan eru kröftug mótmæli á Facebook og víðar vegna fyrirhugaðs samstarfs Egils við fyrirtækið Já um ritun símaskráarinnar.

Um fjögur hundruð manns hafa skráð sig á Facebook-síðuna í mótmælaskyni auk þess sem tæplega þrjúhundruð manns hafa skrifað undir mótmælaskjal á netinu vegna aðkomu Egils að skránni.

Meðal þess sem mótmælendur gagnrýna er færsla sem Egill birti á bloggi sínu árið 2007 og fjallaði um feminista. Meðal ummæla eru eftirfarandi:

Um feminista: „gefa þessum leiðinda rauðsokkum einn granítharðan". „þessar dömur eru flestallar ógeðslegar auk þess að vera geðsjúklingar."

Um Steinunni Valdísi Óskarsdóttur, þá þingmaður Samfylkingarinnar: „Steinunn (Valdís) er portkona".. „á hana dugar ekkert minna en lágmark tveir harðir."

Um Kolbrúnu Halldórsdóttur, þáverandi þingmann Vinstri grænna.: „munu þessir herramenn sem Fréttastofan taldi upp áðan fylla hana eins og hátíðarkalkún."

Sjálfur segir Egill um færsluna:

„Færslan sem er sýnd á þessar facebook síðu var skrifuð annaðhvort 2006 eða 2007 af nokkrum félögum sem sippuðu kannski í sig full miklu rauðvíni eitt kvöldið. Það var Fréttastofa Gillz sem setti þetta á netið og sú Fréttastofa var grófari en gengur og gerist enda skrifaði Gillz sjálfur aldrei undir þær færslur. Ég ber vissulega ábyrgð á henni en blaðamennirnir á þeirri Fréttastofu höfðu fullt ritstjórnarlegt frelsi."

Og Egill bendir á það þurfi ekki að leita langt yfir skammt til þess að finna út að hann sé í raun mikill herramaður og fullkomlega laus við alla kvenfyrirlitningu, „Fólk þarf ekki annað en að lesa metsölubók mína Mannasiðir, horfa á sjónvarpsþættina eða fara á heimasíðu mína Gillz.is til að sjá að það er engin kvenfyrirlitning í gangi. Ég elska konur og hef alltaf gert - mamma mín er kona!"

Egill hlakkar til að fara að vinna að símaskránni sem kemur út á næsta ári og lofar sögulegri bók.

„Ég get lofað fólki því að í fyrsta skipti í sögu hennar getur fólk rifið forsíðuna af og rammað hana inn upp á vegg. Listaverkið sem verður framan á henni er ólýsanlegt," segir Egill um skránna sem kemur út í maí á næsta ári.

Sigríður Margrét Oddsdóttir, framkvæmdastjóri Já, sagði í viðtali við Vísi fyrr í dag að allnokkrir hefðu skráð sig úr símaskránni í mótmælaskyni við Egil. Henni þótti þó illa vegið að honum. Þá tók hún fram að margir hefðu einnig lýst yfir ánægju sinni með aðkomu Egils að símaskránni.




Tengdar fréttir

Fjögur hundruð mótmæla Gillz vegna símaskráar

Hátt í fjögur hundruð manns hafa skráð sig á Facebook-síðu þar sem samstarfi Egils Einarssonar, oft nefndur Gillzenegger, vegna ritun símaskráarinnar er harðlega mótmælt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×