Innlent

Milljónatjón vegna mótmælanna í gær

Ari Edwald forstjóri 365.
Ari Edwald forstjóri 365.

Ari Edwald forstjóri 365 segist ekki vera með nákvæma tölu yfir það tjón sem fyrirtækið varð fyrir í gær vegna mótmælanna við Hótel Borg. Það sé þó ljóst að skemmdir á búnaði og röskun á tekjuöflun hlaupi á milljónum. Hann segir fyrirtækið ætla að skoða í hvaða stöðu það sé gagnvart skemmdarvörgunum. Hann spyr hversu lengi lögreglan geti tekið grímuklæddum ofbeldismönnum sem góðlátlegu gríni.

„Ég er nú ekki með nákvæma tölu en þetta er annarsvegar búnaður sem verður fyrir skemmdum og þarf að laga í dag svo hann verði tilbúinn á morgun. Hinsvegar er þetta röskun á tekjuöflun. Þetta er margþætt tjón sem við höfum ekki lagt mat á enda kannski ekki forgangsmál í dag að klára það. En við munum skoða þetta og í hvaða stöðu við erum gagnvart þessum skemmdarvörgum. Ef það tekst að greina hverjir það eru sem eiga þar í hlut munum við reyna að leita eftir ábyrgð hjá slíkum gerendum," segir Ari.

Hann gagnrýnir lögreglu sem hann segir hafa gripið of seint inn í og spyr hvað þurfi að gerast til þess að menn fari að líta þessa stöðu alvarlegum augum. „Þetta er hætt að snúast um fólk sem er að koma skoðunum sínum á framfæri. Þegar maður horfir á myndbandið á Vísi þá er augljóst að þetta er farið að snúast meira um fólk sem sogast að þessari „action". Fólk sem hleypur til þegar verið að berja og brjóta. Eins og ég sagði í áramótagrein minni í Markaðnum þá hef ég haft almennar áhyggjur af því hvert við erum að stefna," segir Ari og vitnar í orð sín þar um hversu lengi lögreglan taki á grímuklæddum ofbeldismönnum sem góðlátlegu gríni.

„Þetta er auðvitað komið út fyrir allt það sem fólk getur sætt sig við sem býr í eðlilegu samfélagi. Þetta er erfið lífsreynsla fyrir alla þá sem lenda í svona, ekki bara fyrir þá sem urðu fyrir líkamstjóni. Fólk er mjög slegið."










Tengdar fréttir

Kryddsíldinni hætt vegna mótmæla - myndir

Hætta þurfti útsendingum á Kryddsíld Stöðvar 2 vegna mótmæla á Hótel Borg. Mótmælendur ruddust inn á hótelið þar sem leiðtogar stjórnmálamanna sátu fyrir svörum oog brenndu í sundur kapla. Lögregla náði að rýma húsið, og er nú fjölmennt lögreglulið fyrir utan Hótel Borg og reynir að varna mótmælendum inngöngu.

Lögreglumaðurinn kinnbeinsbrotinn

Lögreglumaðurinn sem fékk grjót í andlitið við mótmælin við Hótel Borg í gærkvöldi var fluttur á slysadeild þar sem kom í ljós að hann er kinnbeinsbrotinn. Þrír voru handteknir og yfirheyrðir vegna málsins.

Mótmælin við Hótel Borg - Myndband

Vísir fylgdist með mótmælunum við Hótel Borg fyrr í dag. Mótmælin voru nokkuð harkaleg og enduðu með því að útsendingu frá Kryddsíld Stöðvar 2 var hætt. Lögreglan beitti piparúða og nokkrir voru handteknir á vettvangi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×