Innlent

Mótmælum vörubílstjóra lokið

MYND/Hafsteinn Ársælsson

Mótmælum vörubílstjóra og stuðningsmanna þeirra á tveimur fjölförnum stöðum í borginni er lokið og ók þeir fyrir stundu á brott og þeyttu bílflautur sínar.

Talið er að samanlagt um hundrað atvinnubílstjóarar hafi safnast saman á stærstu gatnamótum landsins á mótum Kringlumýrarbrautar og Miklubrautar annars vegar og í Ártúnsbrekku hins vegar og stöðvuðu umferð í hádeginu í um hálfa klukkustund. Með þessu vildu þeir láta í ljós óánægju sína með hátt olíuverð og álögur ríkisins á vörubílstjóra.

Mikil samstaða virðist vera hjá hópnum en hluti hans var einnig í mótmælum í Ártúnsbrekku á fjórða tímanum í gær. Þá var umferð stöðvuð á leið út úr bænum en í þetta sinn stöðvuðu bílstjórar umferð í báðar áttir.

Vörubílstjórar lokuðu umferð í báðar áttir í Ártúnsbrekku í dag. MYND/Jóhann

Fréttamaður Vísis var í Ártúnsbrekku. Þar gáfust farþegar í strætisvagni upp á að bíða og fóru út úr vagninum. Lögregla mætti svo á vettvang og tók niður númer bílanna sem tóku þátt í mótmælunum og í kjölfarið lauk þeim. Bæði á Miklubraut og í Ártúnsbrekku þeyttu bílstjórarnir flautur sínar þegar þeir óku af vettvangi. Bílstjórarnir munu þó hafa ekið í hægt upp Ártúnsbrekkuna áður en aðgerðunum lauk endanlega.

Daníel G. Ingimarsson, einn þeirra sem tók þátt í mótmælunum í Ártúnsbrekku í dag, sagði bílstjóra myndu halda áfram mótmælum eftir helgi yrði ekki orðið við kröfu þeirra um fund með stjórnvöldum. „Við höfum mikið þol," sagði Daníel.

Mikil leynd hvíldi yfir aðgerðum bílstjóranna þar sem þeir óttuðust að lögregla myndi stöðva aðgerðir þeirra áður en þeir færu af stað. Jón Viðar Matthíasson slökkvililiðsstjóri gagnrýndi í gær aðgerðir vörubílstjóranna og sagði þær ógna sjúkraflutningum á höfuðborgarsvæðinu. Bílstjórarnir þyrftu að láta vita af aðgerðunum.

Páll Pálsson, einn af forsvarsmönnum nýstofnaðra hagsmunasamtaka vörubílstjóra, sagði stutt í frönsku aðferðina eins og hann orðaði það, en franskir mótmælendur hafa í gegnum tíðina meðal annars gripið til þess að sturta skítahlassi á tröppur opinberra stofnana.

MYND/Egill
MYND/Egill
MYND/Egill
MYND/Egill
MYND/Hafsteinn
MYND/Jóhann



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.