Innlent

Páll Baldvin og Björgvin ráðnir ritstjórar DV

Páll Baldvin Baldvinsson
Páll Baldvin Baldvinsson MYND/Vilhelm

Páll Baldvin Baldvinsson, menningarritstjóri DV, og Björgvin Guðmundsson, blaðamaður á Markaðinum, viðskiptablaði Fréttablaðsins, hafa verið ráðnir ritstjórar DV í stað Jónasar Kristjánssonar og Mikaels Torfasonar sem sögðu upp í morgun. Eins og kunnugt er hefur blaðið og ritstjórn þess legið undir mikilli gagnrýni undanfarna daga eftir að maður á sextugsaldri svipti sig lífi eftir að DV birti frétt um að hann væri sakaður um kynferðislegt ofbeldi.

Páll Baldvin hóf störf á DV í ágúst 2004 og hefur gegnt starfi menningarritstjóra blaðsins. Hann var innkaupastjóri Stöðvar 2 frá 1987 og dagskrárstjóri 1995-2001 og listrænn ráðunautur Leikfélags Reykjavíkur 1991-1995. Páll Baldvin var ritstjóri Stúdentablaðsins 1975-1977 og hefur fjallað um menningarmál í fjölmiðlum frá 1970 á Tímanum, Þjóðviljanum og DV, RÚV, Stöð 2 og NFS. Páll Baldvin er menntaður í bókmenntafræði frá Háskóla Íslands og leikhúsfræði frá Goldsmith College í London.

Björgvin hóf störf á Fréttablaðinu þegar það var stofnað vorið 2001. Í upphafi árs 2003 réði hann sig á ritstjórn Morgunblaðsins þar til hann snéri aftur og tók þátt í stofnun Markaðarins, fylgiblaðs Fréttablaðsins um viðskipti, í apríl 2005. Björgvin var formaður Heimdallar, félags ungra sjálfstæðismanna í Reykjavík, í tvö ár og sat í stjórn Sambands ungra sjálfstæðismanna. Hann hefur stundað nám í hagfræði við Háskóla Íslands.

 

Jónas Kristjánsson og Mikel Torfason sendu frá sér tilkynningu í morgun þar sem þeir tilkynntu um uppsögn sína. Þar segir orðrétt: „DV hefur lent í ófriði í umræðum í þjóðfélaginu undanfarna daga. Nauðsynlegt er að skapa að nýju ró um blaðið og koma á vinnufriði hjá öllu því dugandi starfsfólki, sem unnið hefur á ýmsum sviðum þess. Til þess að svo megi verða höfum við sagt af okkur sem ritstjórar blaðsins frá og með deginum í dag."

Skömmu seinna var tilkynnt að Páll Baldvin og Björgvin hefðu verið ráðnir ritstjórar DV í stað Jónasar og Mikaels.

Stjórn Dagsbrúnar fundaði í morgun og sendi svo frá sér yfirlýsingu þar sem segir að stjórnin virði þá ákvörðun ritstjóra DV að láta af störfum. Vegna umræðu undanfarinna daga um ábyrgð eigenda og stjórnar á efni fjölmiðla á vegum dótturfélagsins 365 taki stjórnin fram að hún starfi eftir starfsreglum þar sem m.a. sé kveðið á um að stjórnarmönnum sé óheimilt að hlutast til um einstök umfjöllunarefni fjölmiðla í eigu félagsins. Aðkoma stjórnarinnar að fjölmiðlunum felist í almennri stefnumótun.

Þá ítrekar stjórn Dagsbrúnar að hún standi vörð um tjáningarfrelsi, prentfrelsi, upplýsingafrelsi og gildi lýðræðis og mannréttinda. Félagið virði grundvallarreglur frjálsrar blaðamennsku og leggi áherslu á sjálfstæði ritstjórna, m.a. gagnvart eigendum, auglýsendum, hagsmunahópum og opinberum aðilum.

Fréttastofa NFS hefur ekki náð tali af hinum nýráðnu ritstjórum DV í morgun þrátt fyrir ítrekaðar tilraunir og var fréttamanni vísað út af skrifstofu blaðsins. Þau svör voru gefin að ritstjórarnir væru á fundi.





Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.