Tónlist

Latabæ spáð meiri vinsældum en Justin

Er eitt vinsælasta sjónvarpsefnið í Bretlandi og diskurinn með lögum úr þættinum þykir líklegur til vinsælda
Er eitt vinsælasta sjónvarpsefnið í Bretlandi og diskurinn með lögum úr þættinum þykir líklegur til vinsælda

Smáskífa Latabæjar, Bing Bang, þykir líkleg til vinsælda um jólin í Bretlandi ef marka má veðbankann Wiliam Hill sem er einn sá virtasti í sínu fagi. Smáskífan er meðal þeirra fimm sem líklegastar þykja til að hreppa fyrsta sætið á vinsældarlistanum og eru líkurnar sagðar einn á móti tuttugu en listinn verður gerður opinber á jóladag. Efst á blaði er fyrsta smáskífa sigurvegarans í X-Factor en þættirnir njóta mikilla vinsælda hjá Bretununum.

Fast á hæla hans eru skallapopparinn Cliff Richard, All Angels og Take That en meðal þeirra sem Glanni glæpur og Íþróttaálfurinn skjóta ref fyrir rass eru Girls Aloud, Westlife, Justin Timberlake og Gwen Stefani.
Bing Bang er lokalagið í Latabæjar-þáttunum og á smáskífunni er það í nokkrum útgáfum, meðal annars í karókí-útgáfu svo að börnin geti spreytt sig á því.

Vinsældir Latabæjar verða sífellt meiri hjá breskum börnum en þátturinn var nýlega tilnefndur til Bafta-verðlaunanna bresku sem þykja með þeim virtustu í heimi. Þátturinn er sýndur á tveimur vinsælustu sjónvarpsstöðvum Bretlands, BBC og Nickledeon, sem er að sögn Kjartans Más Kjartanssonar, upplýsingafulltrúa LazyTown, algjört einsdæmi. "Þær hafa yfirleitt barist um bestu bitana en þetta samstarf gerir það að verkum að flest börn geta með góðu móti horft á þættina," segir Kjartan.
-fgg




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.