Innlent

Sumarhúsalóðir á útsöluverði

"Ef sumarhúsalóð, á þessum stað, kostar ekki nema á tvö hundruð og fimmtíu þúsund krónur er það spottprís," segir Sigurður Sveinsson, löggiltur fasteignasali hjá fasteignasölunni Bakki.com á Selfossi. Hann segir að eins hektara lóðir í Grímsnes- og Grafningshreppi seljist á um tvær til tvær og hálfa milljón og landið á Úlfljótsvatni sé ekki síðra. Hin nýja byggð Orkuveitunnar og Klasa við Úlfljótsvatn á að rúma að minnsta kosti 600 sumarhús en jörðin var lögð fram sem hlutafé í nýtt félag í eigu aðilanna fyrir hundrað og fimmtíu milljónir króna. Í hluthafasamkomulagi milli félaganna kemur fram að gert sé ráð fyrir því að lóðirnar sem byggjast eiga, verði um hálfur hektari að stærð. Þannig má ætla að hver lóð sé að jafnaði um tvö hundruð og fimmtíu þúsund króna virði en það getur verið breytilegt eftir stærð og legu hverrar lóðar. Guðmundur Þóroddsson, forstjóri Orkuveitunnar, segir að ákvörðun um verð fyrirtækisins hafi verið ákveðið eftir mat Magnúsar Leópoldssonar fasteignasala. "Það var miðað við það verð sem hefur verið í gangi þarna undanfarið." Magnús segir að verðmætaaukningin á landinu verði til þegar landið verði þróað og það skipulagt með Klasa sem sé fyrirtæki sem búi yfir þekkingu. "Við hefðum auðvitað getað staðið í því sjálfir að skipuleggja og selja landið en teljum réttara að leita til aðila sem hafa sérþekkingu á þessu sviði," segir Guðmundur. Hann gefur lítið fyrir þá aðferð að bera saman verð sumarhúsalóða með þessum hætti. "Við hefðum sjálfir getað sett nokkur hundruð milljónir í það að búa til vegi, byggja bryggju og svo framvegis og hver lóð hefði þá orðið meira virði. Við höfum ákveðið að gera það ekki og ætlum að láta aðra í þessa vinnu og þannig búum við til verðmæti en tökum ekki einir áhættuna að því þar sem við höfum fagaðila með okkur í þessu verkefni," segir Guðmundur.




Fleiri fréttir

Sjá meira