Viðskipti innlent

Fullyrðingar Símans um „stærsta farsímanetið“ voru villandi

Stefán Ó. Jónsson skrifar
VÍSIR/VILHELM
Neytendastofa telur að fullyrðing símafyrirtækisins Símans um „stærsta farsímanet landsins“ brjóti gegn ákvæðum um eftirlit með viðskiptaháttum og markaðssetningu.

Tilkynnt var um úrskurðurinn á heimasíðu Neytendastofu í dag.

Málavextir voru þeir að símafyrirtækið Vodafone kvartaði til Neytendastofu vegna auglýsingaherferðar Símans sem bar yfirskriftina „Segjum sögur“ en í henni komu fram fullyrðingar um að Síminn væri með stærsta farsímanet landsins.

Vodafone taldi að auglýsingarnar væru villandi þar sem engar sönnur hafi verið færðar á fullyrðingunni. Síminn hafnaði því að auglýsingarnar væru villandi eða blekkjandi þar sem farsímanet fyrirtækisins samanstandi af dreifikerfum fyrir GSM (2G net), UTMS (3G net) og LTE (4G net) og því þurfi að líta til heildarinnar sem gerir það að verkum að net Símans sé stærst.

Fullyrðingin óskýr

Neytendastofa taldi að þar sem í auglýsingunum kæmi ekki fram hvað átt væri við með með stærsta farsímanetinu það er hvort átt væri við stærsta þjónustusvæðið eða stærsta net þjónustukerfa með flestum sendum, væru auglýsingarnar villandi.

Bæði stærð þjónustusvæðis og stærð dreifinets, geta haft áhrif á ákvörðun neytenda um viðskipti þar sem hvort tveggja getur haft áhrif á þá þjónustu sem þeir njóta. Því þarf að koma skýrt fram hvað átt sé við með stærð farsímanets það er hvort um sé að ræða stærð þjónustusvæðið eða stærð dreifinets og fjölda senda. 

„Síminn hf., Ármúla 25, Reykjavík, hefur með birtingu fullyrðingarinnar „Segjum sögur á stærsta farsímaneti landsins“ án þess að fram komi skýringar á því hvað felist í stærsta farsímanetinu, brotið gegn ákvæðum 5. gr., 1. mgr. 8. gr. og 2. mgr. 9. gr. laga nr. 57/2005, um eftirlit með viðskiptaháttum og markaðssetningu. Með vísan til 2. mgr. 21. gr. laga nr. 57/2005, um eftirlit með viðskiptaháttum og markaðssetningu, er Símanum hf. bannað að viðhafa ofangreinda viðskiptahætti,“ segir í ákvörðunarorði Neytendastofu.

Uppfært kl. 16:45

Síminn telur að túlkun Neytendastofu sé í meira lagi vafasöm og mun vísa málinu til Áfrýjunarnefndar neytendamála.  Þetta kemur í tilkynningu frá fyrirtækinu. 

Þar segir einnig: 

Neytendastofa segir orðrétt: „Þar sem Síminn hefur lagt fram gögn til staðfestingar að félagið hafði yfirburði yfir keppinauta í stærð dreifinets og fjölda senda þegar auglýsingin var birt telur Neytendastofa fullyrðinguna sannaða."  Í sömu ákvörðun er engu að síður komist að þeirri niðurstöðu að fullyrðing Símans um að fyrirtækið sé með stærsta farsímanetið feli í sér „villandi viðskiptahætti". Ástæðan er sú að ekki hafi verið nákvæmlega tilgreint hvað væri átt við með stærsta farsímaneti. Neytendastofa telur mögulegt að skýra það með vísan til útbreiðslu eða stærðar dreifikerfis.






Fleiri fréttir

Sjá meira


×