Innlent

Frumvarp um ný kvótalög lagt fram fyrir jól

Heimir Már Pétursson skrifar
Veiðigjöld munu ekki hækka og jafnvel lækka samkvæmt frumvarpi sjávarútvegsráðherra um breytingar á lögum um stjórn fiskveiða. Frumvarpið byggir á svokallaðri samningaleið þar sem samið yrði við útgerðir um aðgang að fiskveiðiauðlindinni til tuttugu eða 25 ára.

Eitt af stóru málum núverandi ríkisstjórnar eru fyrirhugaðar breytngar á lögum um stjórn fiskveiða. Sigurður Ingi Jóhannsson sjávarútvegsráðherra kynnti drög að frumvarpi um breytingar á lögunum í stjórnarflokkunum í gær. Samkvæmt heimildum fréttastofunnar felur frumvarpið ekki í sér hækkun á veiðigjöldum á útgerðina frá því sem nú er og gætu gjöldin jafnvel lækkað.

Engar tölur í þessum efnum munu þó hafa fylgt frumvarpsdrögunum sem ráðherra kynnti stjórnarflokkunum í gær. En gjöldin munu taka mið af afkomu útgerðarinnar hverju sinni.  Hins vegar var þar kynnt til sögunnar ákveðin aðferðarfræði við útreikning veiðigjalda, en miðað er við að gjaldið standi að minnsta kosti undir hafrannsóknum, starfsemi Landhelgisgæslu og annarra þátta sem tengjast sjávarútveginum.

Þá er farin svo kölluð samningaleið við úthlutun veiðiheimilda. Hún byggir á því að ríkið og útgerðirnar geri með sér nýtingarsamninga. sem byggja á núverandi aflaheimildum, til einhverra ára og er líklegast að niðurstaðan verði 20 til 25 ár. Það ætti að duga útgerðum til að skipuleggja fram í tímann,til að mynda vegna fjárfestinga og nægjanlegan stöðugleika til að bankar vilji lána þeim. Ríkið héldi áfram um 5,3 prósentum aflaheimilda til félagslegra úthlutana.

Stóri ásteitingarsteinninn verður hins vegar væntanlega uppsagnarákvæði þessara samninga því báðir aðilar gætu sagt samningunum upp. Samkvæmt heimildum fréttastofunnar er engin niðurstaða komin varðandi þetta en líklegt að uppsagnarákvæðið verði á bilinu 5 til 10 ár.

Fjárlagaskrifstofa fjármálaráðuneytisins er nú að meta frumvarpið en það hefur enn ekki verið lagt fram í ríkisstjórn. Hins vegar mun stefnt að því að frumvarpið komið fram á Alþingi fyrir jól.




Fleiri fréttir

Sjá meira


×