Viðskipti innlent

Frumtak fjárfestir fyrir 81 milljón í Valka ehf.

Frá vinstri: Hallbjörn Karlsson, Helgi Hjálmarsson, Eggert Claessen, Árni Hauksson og Svana Gunnarsdóttir.
Frá vinstri: Hallbjörn Karlsson, Helgi Hjálmarsson, Eggert Claessen, Árni Hauksson og Svana Gunnarsdóttir.
Frumtak, sem er í eigu Nýsköpunarsjóðs atvinnulífsins, hefur fjárfest fyrir 81 milljón kr. í nýsköpunarfyrirtækinu Valka ehf.

Í tilkynningu segir að Valka ehf. er nýsköpunarfyrirtæki sem sérhæfir sig í tæknilausnum fyrir fiskiðnaðinn.  Lausnir Völku við sjálfvirkan skurð og flokkun á fiski hafa vakið mikla athygli þar sem þær auka nýtingu og verðmæti hráefna umtalsvert.

Valka hefur einnig þróað hugbúnað til að halda utan um pantanir á ferskum fiski og framleiðsluferlið. Fyrirtækið er nú að þróa beinaskurðarvél sem notar vatn og röntgentækni til þess að ná fram nákvæmari skurði og betri nýtingu á hráefni. Þetta verkefni er unnið í samstarfi við kaupanda og AVS þróunarsjóðinn.

Framtíðarsýn Völku er að vera leiðandi í þróun og framleiðslu á vinnslukerfum fyrir fiskafurðir.  Aukin sjálfvirkni, bætt nýting og frábær meðhöndlun hráefnis ásamt auknum afköstum eru allt atriði sem stuðla að aukinni hagkvæmni og auka samkeppnisforskot vinnslufyrirtækja.

Félagið, sem stofnað var árið 2003 af Helga Hjálmarssyni, hefur vaxið hægt og örugglega eftir því sem það hefur þróað tæknilausnir til sölu á innlendum og erlendum markaði.  Félagið á þegar nokkur einkaleyfi og eru fleiri í vinnslu.  Valka hefur m.a. selt afurðir sínar til Noregs, Kanada, Færeyja auk þess að selja þær hér á landi.

„Valka er áhugavert fyrirtæki fyrir Frumtak“ sagði dr. Eggert Claessen, framkvæmdastjóri Frumtaks.  „Tæknilausnir Völku eiga erindi á heimsmarkað.  Vörur þess byggja á frumkvæði og forystu Íslendinga í sjávarútvegi og það er ánægjulegt að geta lagt fyrirtækinu lið í að markaðssetja vörur sínar á erlendum markaði.  Þessi fjárfesting eykur einnig fjölbreytni í fjárfestingum sjóðsins, sem skiptir okkur miklu máli“.

„Valka er fyrirtæki sem byggir á íslensku hugviti“ sagði Helgi Hjálmarsson, framkvæmda¬stjóri Völku. „Það er samhentur hópur sem hefur staðið að uppbyggingu félagsins og þróað þá tækni sem lausnir félagsins byggja á í góðu samstarfi við viðskiptavini þess.  Samstarf Völku og Frumtaks gerir fyrirtækinu kleift að efla alþjóðlega markaðssetningu og nýta samkeppnisforskot félagsins.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×