Innlent

Friðarsérfræðingur segir bókstafstrú Bandaríkjamanna stuðla að átökum

Heimir Már Pétursson skrifar
Einn áhrifamesti fræðimaður heims í átaka- og friðarfræðum segir lykilatriði að kalla alla þá sem komi að átökum að friðarviðræðum. Ísland geti haft þar hlutverki að gegna með friðarmiðstöð í Reykjavík.

Norðmaðurinn Johan Galtung stofnaði fyrstu rannsóknarstofnun heims í friðar- og átakafræðum í Osló árið 1959 og hefur allar götur síðan komið að þeim málum meðal annars með friðarumleitunum í Afganistan.

„Það þýðir að maður fer til Afganistan og ræðir við Talibana, al Kaída, við utanríkis- og varnarmálaráðuneyti Bandaríkjanna og alla málsaðilana,“ segir Galtung.

Hægt væri að koma á friði í Afganistan ef menn virtu að landamæri Afganistan og Pakistans klyfu í sundur stærstu þjóð án ríkis í heiminum, Pastúna,  sem flestir væru Talibanar. Stórveldi eins og Bandaríkin sniðgangi vissa hópa viljandi eins og ISIS í Sýrlandi.

Það eru mikil mistök og þeir gera það viljandi til að sýna andúð sína og árásarhneigð gegn þeim. Ef maður sniðgengur einhvern hugsar viðkomandi: "Jæja, mér er ekki boðið. Þið heyrið frá mér."

Og það verður í formi ofbeldis?

„Já, nákvæmlega,“ segir Galtung.

Bandaríkin beri mesta ábyrgð á átökum í heiminum frá seinni heimsstyrjöld sem hafi og hafi drepið 20 milljónir í 37 löndum samkvæmt nýjustu ransóknum. Þar ráði kristin bókstafstrú Bandaríkjamanna miklu.

„Það er baráttan milli guðs og kölska. Líttu á hvernig biblían endar: Harmagedón með lokaorrustunni. Maður á ekki í samræðum við kölska. Maður spyr ekki fyrir hvað hann stendur því það er jú illskan uppmáluð. Bandaríkjamenn trúa á þetta,“ segir Galtung. Bandaríkin séu jafnvel meira trúarríki en Íran því Íranir séu raunsærri.

Galtung flytur erindi í Háskóla Íslands í hádeginu á morgun og segir að þótt Ísland sé lítið og herlaust geti það lagt lóð á vogarskál friðar heiminum. Nafn Reykjavíkur sé verðmætt vegna leiðtogafundarins árið 1986.

„Fundurinn sjálfur bar ekki árangur sem slíkur en hann stuðlaði með afgerandi hætti að lokum kalda stríðsins. - Komið á fundi í Reykjavík með ríkjum í austri og vestri. Bjóðið Washington, bjóðið Moskvu, bjóðið Kænugarði og Donetsk og þá mun afar áhugaverð staða koma upp,“ segir Johan Galtung.




Fleiri fréttir

Sjá meira


×