Fræðsla um heimilisofbeldi nauðsynleg

Vísir Aðsendar greinar 05. desember 2011 16:00

Baldur Stefánsson, Brynjar Árnason og Jóhannes Guðmundsson, nemendur í Verkmenntaskólanum á Akureyri.

Baldur Stefánsson, Brynjar Árnason og Jóhannes Guðmundsson skrifar:

Við erum þrír strákar um tvítugt og hugtök eins og heimilisofbeldi er eitthvað sem við höfum ekki orðið varir við í okkar daglega lífi. Það eina sem við höfum séð af heimilisofbeldi er í sjónvarpi og raunveruleikaþáttum sem eru þessu tengdir. Í þessum þáttum sjáum við að þolandinn kennir sjálfum sér um og þorir ekki að yfirgefa heimilið eða leita sér hjálpar út af hræðslu við gerandann.

Þeir sem verða fyrir ofbeldinu verða svo skaddaðir andlega að þeir fara virkilega að kenna sér um ofbeldið. Gerandinn ásakar fórnarlambið um fáránlegustu hluti og refsar því fyrir það, rétt eins og að skilja eftir ósamanbrotið teppi í sófanum eða óhreint glas á borðinu.

Sumir þolendur eru svo illa farnir andlega að þeir reyna að gera eitthvað af sér til þess að klára það frá að vera barin, þá kemur tilfinning sem er einskonar léttir fyrir þolandann yfir því að vera búinn að klára refsinguna frá þennan daginn eða þessa vikuna. Fyrir gerandann verður Þetta því eins konar fíkn í sumum tilfellum, einskonar skapsveiflur sem koma reglulega fram, svona er þetta í sjónvarpinu.

Við erum kannski ungir ennþá en við áttum okkur samt á því hversu hræðilegar afleiðingar heimilisofbeldis geta verið, ekki aðeins fyrir fullorðna heldur einnig börnin á heimilinu. Afleiðingar fyrir börnin geta verið misjafnar og oft á tíðum mjög alvarlegar. Börnin geta bælt inni í sér tilfinningarnar og ofbeldið getur haft mikil áhrif á félagslega færni, einnig getur þetta haft slæm áhrif þegar þau verða eldri og fara sjálf að leita í sambönd. Í sumum tilfellum eiga þau erfitt með að gera sér rétta mynd af eðlilegu sambandi.

Við þekkjum kannski engan sem orðið hefur fyrir heimilisofbeldi, eða heyrum ekki mikið af því, en við vitum að það er eitthvað sem við og fleiri mættu vera opnari fyrir í samfélaginu. Það er oft talað um andlegt og svo líkamlegt heimilisofbeldi, að ofbeldið sé oft dulið og ekki öllum sýnilegt þess vegna erum við sammála um að það eigi að vera til betri aðstaða til þess að taka á móti fórnarlömbum í samfélaginu þar sem þeim er veitt hjálp. Það á að taka hart á ofbeldismönnum en jafnframt bjóða þeim þá sálfræðilegu hjálp sem þeir þurfa.

Fólk verður að gera sér grein fyrir að allt heimilisofbeldi er mjög alvarlegt, hvort sem það er andlegt eða líkamlegt. Það verður að tala opinskátt um allt ofbeldi en ekki bara allra alvarlegustu tilvikin þar sem fórnarlambið þarf að leita sér aðstoðar vegna mjög slæmra áverka út af ofbeldi.

Hvað ef það væri hægt að koma í veg fyrir ofbeldi með meiri fræðslu í t.d. grunnskólum og framhaldsskólum? Okkur finnst fræðsla á þessum stigum allt of lítil, fræðslan á að hvetja fólk á öllum aldri til að hafa opin augu fyrir ummerkjum ofbeldis. Ekki bara á eigin heimili heldur einnig hjá kunningjum og vinum. Með forvörnum og opinni umræðu um að heimilisofbeldi sé staðreynd, þá opnar fólk augun og með því vonum við að fólk sé opið fyrir því að láta öllum líða vel í sameiningu á íslenskum heimilum í framtíðinni.

Til baka

Fræðsla um heimilisofbeldi nauðsynleg

Tengdar greinar:

Fleiri fréttir - Aðsendar greinar

Mest lesið: Umræðan

Nýjast á Vísi

Fréttablaðið

Stöð2