Formaður slitastjórnar Dróma: Segist aðeins hafa séð fimm kvartanir

Vísir Innlent 22. febrúar 2012 20:07

Formaður slitastjórnar Dróma, Hlynur Jónsson, segir félagið aðeins hafa fengið að sjá fimm kvartanir á tveimur fundum sem félagið hefur átt með Umboðsmanni skuldara.

Hlynur var í viðtali við Kastljós fyrr í kvöld þar sem hann sagði meðal annars að það kæmi sér ekki á óvart að fleiri kvartanir hafi borist, eftir að umfjöllun um félagið hófst fyrir nokkrum vikum, þá sérstaklega í ljósi þess að það hafi verið beinlínis auglýst eftir þeim, að hans sögn.

Hann segist hinsvegar gera athugasemdir við það að kvartanirnar, sem um ræðir, hafi ekki borist inn á þeirra borð fyrir utan þessar fimm sem hann vitnaði til í upphafi viðtalsins.

„Ég geri ekki lítið úr því ef viðskiptavinir telji sig hafa yfir einhverju að kvarta en geri athugasemdir við það að þær berist ekki inn á okkar borð," sagði Hlynur.

Hann segir ennfremur að það sé ekki rétt að Arion banki hafi freistast til þess að kaupa lánasöfnin af félaginu. Hann bendir hinsvegar á að þegar Drómi varð til, eftir að SPRON og Frjálsi fjárfestingabankinn fóru í þrot árið 2009, hafi félagið haft til umráða skuldir níu þúsund einstaklinga. Félagið hafi hinsvegar selt lánasöfn fyrir 15 milljarða til íbúðalánasjóðs, auk þess sem eignarhaldsfélag seðlabankans innleysti stóran hluta af lánunum.

Því séu fjögur þúsund lán eftir í þrotabúinu eins og staðan er í dag.

Hlynur segir ennfremur að það sé ekki rétt að þrotbúið hafi ekki hag af því að fólk greiði ekki af lánum sínum áfram. Verðmætin séu fólgin einmitt í því að skuldarar geti staðið undir lánum sínum. Þá bendir hann ennfremur á að Drómi sé samstafsaðili af öllum þeim úrræðum sem séu til boða eins og 110 prósent leiðina og sértæka skuldaaðlögun og fleira.

Spurður hver eigi Dróma svarar Hlynur því til að það séu að mestu leytinu til erlendir kröfuhafar. Evrópskir bankar aðallega.

Hann tekur hinsvegar fram að allt það fé sem innheimtist hjá Dróma renni til Arion banka. Ef það nást ekki verðmæti úr þrotabúinu endar ábyrgðin hjá ríkissjóði. Því þurfi skattgreiðendur að borga brúsann að lokum fáist ekki nægar innheimtur. Hann líti því svo á að þrotabúið sé einnig að vinna fyrir skattgreiðendur.

Hægt er að hofa á viðtalið við Hlyn í Kastljósinu hér.

Til baka

Formaður slitastjórnar Dróma: Segist aðeins hafa séð fimm kvartanir

Fleiri fréttir - Innlent

Fréttir eftir mánuði

2012

2011

2010

2009

2008

2007

2006

2005

2004