Innlent

Fleiri nálgunarbannsbeiðnir

viktoría hermannsdóttir skrifar
Síðan átakið hófst hefur verið tilkynnt um fleiri heimilisofbeldismál til lögreglunnar á höfuðborgarsvæðinu.
Síðan átakið hófst hefur verið tilkynnt um fleiri heimilisofbeldismál til lögreglunnar á höfuðborgarsvæðinu. NORDICPHOTOS/Getty
„Við erum klárlega að sjá fleiri mál. Þetta skilar sér líka í aukinni tiltrú almennings á verkefninu, við erum að fá fleiri tilkynningar,“ segir Alda Hrönn Jóhannsdóttir, aðstoðarlögreglustjóri á höfuðborgarsvæðinu. Þann 12. janúar síðastliðinn var sett í gang sameiginlegt átak lögreglu, velferðarsviðs og Barnaverndar gegn heimilisofbeldi og hefur tilkynningum um heimilisofbeldismál fjölgað um helming á mánuði síðan.

Í átakinu fólst að verklagi lögreglu var breytt, aukin áhersla lögð á málin strax í upphafi þegar lögregla er kölluð til. „Við einbeitum okkur að því, tökum myndir á vettvangi, af áverkum, reynum að fá sem réttastan framburð. Rannsakandi kemur á vettvang, auk Barnaverndar og félagsþjónustu. Við erum að grípa fyrr inn í og fylgjum málum betur eftir,“ segir Alda.

Nálgunarbönnum hefur verið beitt í meiri mæli í takt við aukinn fjölda mála að sögn Öldu.

Hæstiréttur staðfesti í síðustu viku ákvörðun lögreglustjórans á höfuðborgarsvæðinu um að maður skyldi sæta brottvísun af heimili og nálgunarbanni við eiginkonu sína og son hennar í fjórar vikur. Áður hafði Héraðsdómur Reykjavíkur hafnað kröfu lögreglustjórans.

Alda Hrönn jóhannesdóttir
Alda segir þetta mál ekki vera einsdæmi. Í janúar felldi Hæstiréttur úr gildi þrjá nálgunarbannsúrskurði lögreglustjórans. Alda segir lögregluna hafa lært af þeim málum og rökstyðji nú nálgunarbannsúrskurði betur. Farið hefur verið fram á fleiri nálgunarbannsúrskurði en hefur verið áður síðan átakið fór í gang. „Það kemur sjálfkrafa – þegar við komum af meira afli í málin á fyrri stigum þá höfum við meiri upplýsingar sem gerir okkur kleift að átta okkur betur á málum og málavöxtum. Og getum tekið ákvarðanir um þessar þvingunarráðstafanir. Við erum að rökstyðja málin betur og sögu þeirra sem í hlut eiga. Við erum að vinna málin betur, við erum alltaf að læra og með auknum málafjölda þá eru dómstólar líka að fá aukna þekkingu.“

Fréttablaðið sagði frá því í síðustu viku að annasamt hefði verið í Kvennaathvarfinu undanfarið og sagði Sigþrúður Guðmundsdóttir, framkvæmdastýra athvarfsins, að rekja mætti fjöldann til átaksins. Um 20 dvelja þar nú, bæði konur og börn. Hins vegar sé líka aukning hjá þeim sem dvelja þar í skamman tíma og það sé vegna þess að lögregla sé að beita hinni svokölluðu austurrísku leið í meiri mæli, það er þegar ofbeldismaðurinn er fjarlægður af heimilinu, ekki þolandinn.




Fleiri fréttir

Sjá meira


×