Fjölskylduhjálp hætti að mismuna fólki

Samtök kvenna af erlendum uppruna á Íslandi krefjast þess að Fjölskylduhjálp Íslands hætti að mismuna fólki sem leitar til hjálparsamtakanna. Samtökin vilja einnig að stjórnvöld og þau fyrirtæki sem styrkja Fjölskylduhjálp Íslands taki afstöðu til þess hvort þau séu fylgjandi mismunun milli fólks á grundvelli uppruna og hvort þau vilji endurskoða framlag sitt til góðgerðastofnana sem stunda slíka mismunun.

Það var Fréttablaðið sem greindi frá því í dag að nú fer Fjölskylduhjálp fram á vottorð frá Félagsþjónustu Reykjavíkur vilji útlendingar, sem koma oftar en einu sinni í mánuði, fá matarúthlutun hjá Fjölskylduhjálpinni. Þetta hefur verið harðlega gagnrýnt í dag.

„Á tímum sem þessum er mikil hætta á að neikvæð umræða skapist í kringum ákveðna hópa í samfélaginu og ber að forðast það. Á þenslutímanum unnu útlendingar þau störf sem þeim var sérstaklega boðið til landsins að vinna og greiddu meira til samfélagsins en þeir þáðu," segir í tilkynningu frá Samtökum kvenna af erlendum uppruna á Íslandi.

„Við viljum ekki umburðarlyndi gagnvart þeim sem svíkja velferðarkerfið eða misnota aðstoð hjálparsamtakanna, hvorki á meðal Íslendinga né útlendinga. Við krefjumst hins vegar tillagna frá Fjölskylduhjálp hvernig þau geta tryggt að engir skjólstæðingar þeirra misnoti kerfið, óháð uppruna eða stöðu í samfélaginu."

Samtökin krefjast þess að mismunun verði tafarlaust hætt. Þá lýsa þau ánægju yfir hversu skjótt margir brugðust við í dag og nefna sérstaklega borgarráð Reykjavíkur og Árna Pál Árnason, félags- og tryggingamálaráðherra.