Ferguson: Guardiola nær aldrei sama árangri hjá City og hann gerði hjá Barca

Sir Alex Ferguson, fyrrverandi knattspyrnustjóri Manchester United, ræddi helstu stórmál fótboltans í stóru viðtali við Sky Sports sem breski íþróttafréttamiðilinn birtir nú brot og brot úr á heimasíðu sinni.

Ferguson var eðlilega spurður út í Pep Guardiola sem tekur við Manchester City í sumar en spænski þjálfarinn var lengi vel talinn líklegur arftaki Sir Alex á Old Trafford.

Sjá einnig:Ferguson: Þessir 1-0 sigrar skila Leicester titlinum eins og ég veit allt um

Guardiola bjó til, að flestra mati, besta lið sögunnar hjá Barcelona þar sem hann fann 14 stóra titla á fjórum leiktíðum og nú er hann búinn að vinna Þýskalandsmeistaratitilinn tvö ár í röð með Bayern München.

„Pep hefur gríðarlegt vinnusiðferði og ætlast til mikils á æfingum. Þeir sem ætla ekki að leggja mikið á sig hjá City munu ekki endast lengi. Hann er hæfileikaríkur þjálfari, það er engin spurning,“ segir Ferguson um Spánverjann í viðtalinu.

„Manchester City var svo sannarlega að landa stórum bita með að fá Pep en þetta verður ekki auðvelt fyrir hann. Enski boltinn er ekki auðveldur.“

„Allir erlendir þjálfarar sem hafa komið hingað segja sömu sögu. Arsene Wenger talaði um hversu erfiður enski boltinn er nokkrum mánuðum eftir að hann kom og sama gerði José Mourinho.“

„Pep mun ná árangri hjá City en hann mun aldrei aftur endurtaka það sem hann gerði hjá Barcelona. Viðmiðið er bara of hátt því það var besta liðið,“ segir Sir Alex Ferguson.