FÖSTUDAGUR 9. DESEMBER NÝJAST 21:11

Mađur handtekinn í Rotterdam grunađur um ađ skipuleggja hryđjuverk

FRÉTTIR

Félag múslima: Allt uppi á borđinu međ fjármögnun moskunnar

 
Innlent
13:30 15. FEBRÚAR 2016
Salmann Tamimi er formađur Félags múslima á Íslandi, sem hyggst reisa mosku á lóđ í Sogamýri í Reykjavík.
Salmann Tamimi er formađur Félags múslima á Íslandi, sem hyggst reisa mosku á lóđ í Sogamýri í Reykjavík. VÍSIR

Félagi múslima á Íslandi hefur borist erindi Reykjavíkurborgar, þar sem farið er fram á upplýsingar um hvernig staðið verður að fjármögnun byggingar mosku félagsins í Sogamýri. Salmann Tamimi, formaður félagsins, segist sammála borgarstjórn um að æskilegt sé að upplýsingar sem þessar liggi fyrir og ítrekar að engir fjármunir hafi borist frá Sádi-Arabíu vegna byggingarinnar.

Greint var frá því í síðustu viku að Reykjavíkurborg myndi biðja alla þá trúarsöfnuði sem fengið hafa úthlutað lóðum hjá borginni undir fyrirhugaðar byggingar um upplýsingar um fjármögnun bygginganna. Meðal þeirra safnaða er Félag múslima á Íslandi, en tæplega ár er liðið frá því að embætti Forseta Íslands hélt því fram að yfirvöld í Sádi-Arabíu hygðust styðja byggingu moskunnar í Sogamýri.

Stofnun múslima á Íslandi, sem á og rekur Ýmishúsið í Skógarhlíð þar sem Menningarsetur múslima er til húsa, hefur síðan sagst hafa fengið styrkinn frá Sádi-Arabíu. Salmann segir Félag múslima ekki taka við fé frá neinni erlendri ríkisstjórn og að Sádi-Arabar muni ekki styrkja byggingu moskunnar.

Vill að öll fjármögnunin eigi sér stað hérlendis
„Við erum ekkert í þessum fína hóp með Sádi-Aröbum, ég kallaði þá fasista og þeir eru ábyggilega reiðir út í mig,“ segir Salmann og hlær. „Við fáum ekki krónu frá þeim, það er alveg á hreinu.“


Vinningstillagan í samkeppni um hönnun moskunnar í Sogamýri.
Vinningstillagan í samkeppni um hönnun moskunnar í Sogamýri. MYND/ATLI BERGMANN

Salmann segir félagið ætla að svara borginni á næstunni, þó honum finnist hann vera búinn að svara því hvernig staðið verði að fjármögnuninni.

Sjá einnig: Fréttaflutningur forseta Íslands veldur usla

„Ég er búinn að fara í sjónvarpið og segja að við ætlum bara að láta félagana okkar borga,“ segir hann. „Þetta er náttúrulega mjög erfitt en við treystum á að fólk borgi. Ég vil náttúrulega að öll fjármögnunin eigi sér stað hérna. Ég er búin að skrifa félögum á Norðurlöndunum, Danmörku og Svíþjóð, og biðja um aðstoð. En við tökum við ekki við neinu frá neinni ríkisstjórn, það er alveg á hreinu.“

Salmann segist sjálfur upplifa það þannig að beiðnin frá borginni beinist fyrst og fremst að sínu trúfélagi og hefur áhyggjur af því að verið sé að gera söfnunina tortryggilega með því að biðja um þessar upplýsingar nú. Hann ætlar að koma athugasemdum þess efnis áfram til borgarinnar þegar félagið svarar en ítrekar þó að allt sé uppi á borðinu hjá Félagi múslima varðandi byggingu moskunnar.

„Það er ekkert hjá okkur sem er ekki opinbert, það er alveg vitað hvernig við vinnum.“


Deila
Athugiđ. Allar athugasemdir eru á ábyrgđ ţeirra er ţćr rita. Vísir hvetur lesendur til ađ halda sig viđ málefnalega umrćđu. Einnig áskilur Vísir sér rétt til ađ fjarlćgja ćrumeiđandi eđa ósćmilegar athugasemdir og ummćli ţeirra sem tjá sig ekki undir eigin nafni.

 

MEST LESIĐ

  • Nýjast á Vísi
  • Mest Lesiđ
  • Fréttir
  • Sport
  • Viđskipti
  • Lífiđ
Forsíđa / Fréttir / Innlent / Félag múslima: Allt uppi á borđinu međ fjármögnun moskunnar
Fara efst