Lífið

Fékk hlaupabólu í gjöf á tíu ára afmælisdeginum

Jóhann Óli Eiðsson skrifar
Eftirminnilegasta afmæli Kristins var fyrir þrjátíu árum en þá þurfti að aflýsa veislunni eftir að hann fékk hlaupabólu.
Eftirminnilegasta afmæli Kristins var fyrir þrjátíu árum en þá þurfti að aflýsa veislunni eftir að hann fékk hlaupabólu. vísir/anton
Trommarinn Kristinn Snær Agnarsson fagnar fjörutíu ára afmæli í dag. Lítið verður um hátíðarhöld af því tilefni en afmælisbarnið telur að dagurinn í dag verði nánast eins og hver annar mánudagur.

„Ég hugsa að ég fari bara í vinnuna og afgreiði fólk líkt og á venjulegum mánudegi,“ segir Kristinn en hann vinnur sem afgreiðslumaður í Tónastöðinni. Það vill reyndar svo til að samstarfsmaður hans í versluninni á einnig afmæli í dag. „Það gæti verið að við fáum okkur köku í kaffinu. Síðan hefur vinafólk mitt boðið mér í mat.“

Þegar Kristinn er ekki fyrir aftan afgreiðsluborðið í Tónastöðinni má yfirleitt finna hann við trommusettið hjá hinum ýmsu tónlistarmönnum. Í gegnum tíðina hefur hann meðal annars lamið húðir með John Grant, Ásgeiri Trausta, Baggalúti, Megasi, Bang Gang og Jónasi Sig. Eðli málsins samkvæmt fer því mikill tími í að spila á tónleikum vítt og breitt um heiminn.

„Ég á náttúrlega afmæli í febrúar og er því rosalega oft að spila á afmælinu sjálfu eða í kringum það, á hinum og þessum árshátíðum eða þorrablótum,“ segir Kristinn. Einnig hefur það komið fyrir að hann er á tónleikaferðalagi erlendis á afmælisdaginn. „Þá er ekki heldur hægt að gera neitt. Maður er bara að spila á tónleikum.“

Aðspurður um eftirminnilegasta afmælisdaginn nefnir tónlistarmaðurinn tíu ára afmælið til sögunnar. Þá hafði heljarinnar veisla verið undirbúin og búið að bjóða fullt af fólki.

„Síðan rann afmælisdagurinn upp en þá var ég kominn með hlaupabólu. Það var frekar glatað,“ segir Kristinn og hlær. Veislunni var ekki frestað heldur var hún einfaldlega blásin af.

Þrátt fyrir að ekki standi til að halda upp á afmælið núna útilokar Kristinn ekki að gera það síðar. „Það er aldrei að vita nema maður bóki lítinn sal í sumar, bjóði fólki og haldi upp á þetta. Það hentar hins vegar ekki núna.“

Greinin birtist fyrst í Fréttablaðinu.






Fleiri fréttir

Sjá meira


×