Fangelsisstjóri kærir stuld á lyftingatólum

Fréttablaðið Innlent 10. febrúar 2012 08:30

Fyrrverandi fangelsisstjóri segist hafa átt lyftingatæki sem fangelsismálastjóri hafi að honum forspurðum selt til líkamsræktarstövar á Stykkishólmi og á bæ einn í Helgafellssveit.

„Ég er bara sár yfir að tapa þessu vegna þess að þetta er hluti af mínum íþróttaferli,“ segir Geirmundur Vilhjálmsson, fyrrverandi fangelsisstjóri, sem kært hefur Pál Winkel fangelsisstjóra vegna lyftingalóða sem seld voru frá Kvíabryggju.

Geirmundi var vikið úr starfi fangelsisstjóra á Kvíabryggju fyrir um einu og hálfu ári vegna gruns um brot í opinberu starfi. Hann var í nóvember síðastliðnum ákærður fyrir fjárdrátt í starfi og vísað til 39 mismunandi atriða. Þess er krafist að hann endurgreiði ríkinu tæpar tvær milljónir króna.

Að sögn Geirmundar óskaði hann eftir því að fá líkamsræktartækin sem hann eigi – og reyndar fjölmarga aðra muni sína sem enn séu á Kvíabryggju – en fékk afsvar. „Páll Winkel hefur sagt að ég eigi að framvísa nótu fyrir öllu sem ég eigi á Kvíabryggju. Pabbi gaf mér þessi lóð þegar ég byrjaði að æfa tólf ára gamall,“ segir hann.

Geirmundur kveðst hafa uppgötvað nýlega að hluti tækjanna sem hann hafi átt í fangelsinu hafi verið seldur til líkamsræktarstöðvar í Stykkishólmi og á sveitabæ í Helgafellssveit. Hann hafi sjálfur farið á staðinn og gengið úr skugga um að það hafi verið hans búnaður sem seldur var. Um hafi verið að ræða lóð af Brooklyn-gerð sem ekki hafi verið framleidd í þrjátíu ár.

„Ég er ekki að falast eftir að fá þetta til baka frá þeim sem keyptu þetta í góðri trú,“ tekur Geirmundur fram. Hann hafi spurst fyrir um málið hjá núverandi forstöðumanni á Kvíabryggju og fengið þau svör að tólin hafi verið seld að beiðni Páls Winkel.

„Ljóst er að framangreind háttsemi hlýtur að teljast brot í opinberu starfi auk þess sem um þjófnaðarbrot er að ræða,“ segir í kæru sem Geirmundur lagði fram á hendur Páli nú í vikunni. Hann krefst þess að málið verði rannsakað og Páli gerð refsing, komi í ljós að hann hafi mælt fyrir um sölu lóðanna. Þá gerir hann einnig kröfu um 400 þúsund króna bætur.

„Þetta er þvæla,“ segir Páll Winkel. „Þegar ákvörðun var tekin um að banna laus lóð í fangelsum landsins gaf ég fyrirmæli um að selja lóð í eigu fangelsanna. Það var gert.“ gar@frettabladid.is

Til baka

Fangelsisstjóri kærir stuld á lyftingatólum

Fleiri fréttir - Innlent

Fréttir eftir mánuði

2012

2011

2010

2009

2008

2007

2006

2005

2004