Viðskipti erlent

Færeyingar fríska upp á olíuborpall

Kristján Már Unnarsson skrifar
Borpallurinn West Hercules á Skálafirði í Færeyjum.
Borpallurinn West Hercules á Skálafirði í Færeyjum. Atlantic Supply Base/Eli Lassen.
Einn stærsti olíuborpallur heims, risapallurinn West Hercules, hefur undanfarinn mánuð verið í viðamikilli klössun í Færeyjum. Talsmenn þeirra færeysku fyrirtækja, sem koma að vinnunni, eins og forstjóri skipasmiðjunnar  Mest, hafa í viðtölum við oljan.fo lýst stolti yfir því að Færeyingum skuli hafa verið falið svo umfangsmikið og vandmeðfarið verkefni. 

Borpallurinn kom inn til Skálafjarðar þann 19. ágúst síðastliðinn en þar er olíuþjónustumiðstöðin í Rúnavík. Um eitthundrað Færeyingar koma að verkinu og er unnið allan sólarhringinn. Allt að fimmhundruð manns tengjast þó verkinu, þar á meðal starfsmenn borpallsins. Hann er í eigu norska félagsins Seadrill en Statoil hefur pallinn á leigu.

Hótelskipið Nordstjernen í höfn í Rúnavík.Atlantic Supply Base/Eli Lassen.
Allt hótelrými er upptekið í Rúnavík og nágrannabæjum og þurfti að fá sérstakt hótelskip frá Noregi, Nordstjernen, til Skálafjarðar til að hýsa mannskapinn. Til marks um umfangið fyrir færeyskt samfélag, þar sem 48 þúsund manns búa, má geta þess að hlutfallslega er það álíka stórt og 600-700 manna verkefni fyrir Ísland.

Skrúfubúnaður borpallsins er endurnýjaðar í Rúnavík.Atlantic Supply Base/Eli Lassen.
Stærsti verkhlutinn felst í að endurnýja skrúfubúnað borpallsins, sem hefur það hlutverk að halda honum stöðugum meðan á borun stendur, en einnig að knýja hann áfram milli staða. Þá er jafnframt verið að endurnýja leiðslur í pallinum. 

Þetta er í annað sinn sem Færeyingar taka að sér að klassa olíuborpall. Fyrsta verkið var árið 2006, þegar skoski borpallurinn Stena Don kom inn til Þórshafnar til endurnýjunar.



West Hercules boraði tvær holur í lögsögu Færeyja í sumar en án þess að olía fyndist í vinnanlegu magni. Frá Færeyjum heldur hann til Nýfundnalands í Kanada að bora fleiri holur fyrir Statoil.

Mikil umsvif eru í þjónustuhöfninni í Rúnavík þessa dagana.Atlantic Supply Base/Eli Lassen.

Tengdar fréttir

Aldrei lagt jafn mikið í olíuleit í Færeyjum

Mesta og dýrasta átak til þessa til að finna olíu við Færeyjar er hafið. Borpallur er kominn í lögsögu eyjanna til að bora tvær holur sem kosta munu allt að fjörutíu milljarða króna.

Stór áfangi að þjónustuhöfn Norðurslóða við Finnafjörð

Oddviti Langanesbyggðar hefur fulla trúa á því að risahöfn við Finnafjörð verði að veruleika eftir að eitt stærsta hafnafyrirtæki Evrópu, Bremenports, ritaði undir samstarfssamning um að kosta mörghundruð milljóna króna undirbúningsvinnu.

Engin olía í Færeyjum

Færeyingar þurfa enn að bíða eftir olíunni. Norska olíufélagið Statoil tilkynnti í morgun að engin olía hefði fundist við borun á Brugdan 2-brunninum um 130 kílómetra suðaustur af eyjunum.

Reyðarfjörður valinn sem olíubær Íslands

Eykon Energy hefur valið Reyðarfjörð sem þjónustumiðstöð fyrir bæði olíuleit og olíuvinnslu á Drekasvæðinu. Formaður bæjarráðs Fjarðabyggðar segir þetta skapa gríðarleg tækifæri.

Vonbrigði í Færeyjum

Vottur af kolvetnum var staðfestur en ekki í vinnanlegu magni, segir í tilkynningu Jarðfeingis, orkustofnunar Færeyja í dag, um nýjustu olíuborun við eyjarnar.






Fleiri fréttir

Sjá meira


×