Fækkun húsaleigusamninga á Vesturlandi í janúar

Þjóðskrá Íslands hefur tekið saman tölur yfir þinglýsta húsaleigusamninga fyrir núliðinn janúar mánuð. Alls var 868 húsaleigusamningum þinglýst á landinu öllu sem er svipuð tala og fyrir ári síðan. Á Vesturlandi var 52 samningum þinglýst sem er um 19% minna en fyrir ári síðan. Þó er umtalsverð aukning í landshlutanum frá því í desember eða um tæplega 68%. Eins og áður voru flestir húsaleigusamningar gerðir á höfuðborgarsvæðinu eða 537 í janúar og næst mest á Norðurlandi eða 116. Einungis fjórum samningum var þinglýst á Vestfjörðum sem er að jafnaði kaldasta svæðið á leigumarkaði.

Þegar rýnt er í tölur um þinglýsingar frá árinu 2005 kemur í ljós að töluverð aukning verður á þinglýstum húsaleigusamningum eftir efnahagsþrengingar haustið 2008. Sem dæmi þá voru einungis 17 húsaleigusamningar gerðir á Vesturlandi í janúar 2005. Fjórum árum síðar, í janúar 2009, er talan rokin upp í 78. Með góðu móti má því segja að efnahagsþrengingar myndi knýi fólk út á húsaleigumarkaðinn.