Innlent

Eyjólfur hjá föður sínum í Danmörku til frambúðar

Jakob Bjarnar skrifar
Faðir Eyjólfs er nú kominn með forræði yfir drengnum sem er fluttur til hans út til Danmerkur. Móðir hans flúði með hann til Íslands á sínum tíma.
Faðir Eyjólfs er nú kominn með forræði yfir drengnum sem er fluttur til hans út til Danmerkur. Móðir hans flúði með hann til Íslands á sínum tíma.
Eyjólfur Kristinn Elvuson, fimm ára drengur sem til stóð að komið yrði fyrir hjá vandalausum úti í Noregi, hefur nú fengið fastan samastað hjá föður sínum, sem býr úti í Danmörku. Faðirinn, Sigurjón Elías, hefur fengið fullt forræði yfir syni sínum og mun hann búa hjá honum. En, lengi stóð til að norsk yfirvöld fengju forræðið.

Enn að ná áttum eftir gleðitíðindin

Vísir greindi ítarlega frá málinu á sínum tíma en norsk barnayfirvöld ætluðu að koma drengnum fyrir hjá fósturforeldrum, sem svo leiddi til þess að móðuramma Eyjólfs og móðir flúðu til Íslands í örvæntingu sinni. Föðuramma Eyjólfs, Guðný Helga Þórhallsdóttir greinir vinum sínum frá því að málið hafi verið í vinnslu hjá barnavernd Noregs og Barnaverndarstofu og þessi hafi orðið niðurstaðan. DV gerði sér mat úr Facebookfærslu Guðnýjar í morgun en Vísir ræddi við hana nú fyrir skömmu.

Guðný segir þetta sannkölluð gleðitíðindi. „Þetta er magnað. þetta hefur verið svo mikið mál og það hefur reynt mjög á fjölskylduna en nú er þessi óvissa að baki,“ segir Guðný Helga.

Niðurstaða sem allir óskuðu sér

Hún segist vera að reyna að ná áttum. „Þetta hefur verið þannig að maður hefur ekki haft mikla trú á að þetta myndi enda svona vel. Maður heldur þó alltaf í vonina. En, eins og hefur komið fram voru foreldrarnir ekki með sameiginlegt forræði. Að þurfa að berjast fyrir þessu svona í staðinn fyrir að hann fengi að fara beint til pabba síns.“

Guðný Helga segir dásamlegt hversu einhuga þjóðin var og viðbrögðin í dag hafa verið mikil og ánægjuleg. Úr því sem komið var var þetta niðurstaðan sem allir óskuðu sér.

„Þetta átti aldrei að vera nein spurning, átti aldrei að taka svona langan tíma.“

Drengurinn er algjör gullmoli

Svo virðist vera sem hin norska barnavernd hafi verið býsna hörð í horn að taka þó Guðný Helga vilji alls ekki fordæma hana. Hún fór með Eyjólf litla, sem verður sex ára núna í júní, til föður síns í mars og þá fékk hann að vera þar í einhvern tíma. Í aðlögun.

„Og svo fór hann aftur núna, og þá varð hann bara eftir. Í staðinn fyrir að vera bara á fósturheimili. Sem betur fer. Þetta er dásamlegt. Ég er enn að melta að þetta sé komið í höfn. Það er bara svoleiðis. Ég var að tala við þá feðga áðan. Svaka fjör í Danmörku. Gott veður og litli guttinn að hlaupa út í sjó og leika sér. Á ströndinni. Drengurinn er algjört æði, algjör gullmoli,“ segir amma Eyjólfs, Guðný Helga, himinlifandi með farsælar lyktir þessa erfiða máls.


Tengdar fréttir




Fleiri fréttir

Sjá meira


×