Bílar

Eyðslugrannur E-Class sló í gegn í Sparaksturskeppni FÍB

Finnur Thorlacius skrifar
Magnað hve svo stór bíll getur eytt litlu eldsneyti.
Magnað hve svo stór bíll getur eytt litlu eldsneyti.
Lúxusbíllinn Mercedes-Benz E-Class 220d gerði sér lítið fyrir og sigraði sinn flokk í Sparaksturskeppninni um síðustu helgi. Eyðslan á E-Class var aðeins 4,41 lítrar á hundraðið sem er frábær árangur fyrir svo stóran bíl.

E-Class 220d er með nýja gerð dísilvélar sem ber heitið OM 654. Þessi nýja tveggja lítra dísilvél er léttari og eyðslugrennri en eldri dísilvél í E-Class bílum. Samkvæmt upplýsingum frá Mercedes-Benz er eyðslan 13% lægri í þessari nýju vél en í eldri vélinni en samt skilar hún meira afli. Nýja vélin er aðeins 168 kg en sú eldri er 202 kg.

Mercedes-Benz ætlar sér stóra hluti með þessari nýju vél sem mun verða sett í fleiri fólksbíla og atvinnubíla þýska lúxusbílaframleiðandans á næstunni. Í Sparaksturskeppninni var bílnum ekið frá Reykjavík til Akureyrar. E-Class eyddi aðeins 16.76 lítrum á þessari 380 km leið svo að kostnaðurinn við að keyra E-Class frá höfuðborginni í höfuðstað Norðurlands var einungis 3.013 kr. Athygli vekur að E-Class eyddi minna eldsneyti á leiðinni norður en hinn eyðslugranni smábíll Toyota Yaris.






×