Innlent

Erla vonar að árásir og þöggunartilburðir gegn blaðamönnum hætti

Nanna Elísa Jakobsdóttir skrifar
Erla Hlynsdóttir hefur unnið þrjú mál fyrir Mannréttindadómstólnum.
Erla Hlynsdóttir hefur unnið þrjú mál fyrir Mannréttindadómstólnum. Vísir/Valli
Erla Hlynsdóttir, blaðakona, hyggst fagna niðurstöðu þriðja dómsins með kampavínsflösku í kvöld en dómurinn markar lok málaferla hennar við íslenska ríkið.

„Ég er mjög ánægð,“ sagði Erla þegar Vísir náði af henni tali. Hún segist vilja að árásir og þöggunartilburðir gegn blaðamönnum hætti.

„Að vera að reyna að þagga niður umræðu, því það er það sem þetta er.“ Þetta var þriðja málið sem Erla fer með fyrir Mannréttindadómstólinn og verður það síðasta.

Íslenska ríkið var dæmt bótaskylt gagnvart Erlu í dag og niðurstaðan sú að það hefði gerst brotlegt við tjáningarfrelsisákvæði Mannréttindasáttmála Evrópu með því að dæma Erlu fyrir meiðyrði í grein sinni í DV árið 2007.

Grein Erlu sem um ræddi í dóminum í dag fjallaði um málaferli í smyglmáli undir fyrirsögninni: „Hræddir kókaínsmyglarar.“ Erla var dæmd hér á landi fyrir greinina í mars 2010. Taldi dómurinn hana ekki hafa gert fyrirvara við textabrot sem hún hafði upp úr ákæru í málinu.

Þrír óréttlátir dómar íslenska dómstólsins

Erla hefur tvisvar sinnum áður unnið mál gegn íslenska ríkinu fyrir Mannréttindadómstólnum, fyrst árið 2012 fyrir skrif sín um Strawberries og aftur síðastliðið haust fyrir skrif sín um svokallað Byrgismál. Greinin sem dómur dagsins í dag fjallar um var skrifuð 5. Júlí 2007. Því hefur ferlið verið afskaplega langt.

Hún sagðist í samtali við Fréttablaðið í gær frekar sigurviss. „Ég var einmitt mjög sigurviss. En samt var ég að fara í taugum á morgun þegar ég var að bíða eftir niðurstöðunni. Eins og að fara í próf, maður er svo kvíðinn. En um leið og ég sá niðurstöðuna þá var þetta svo mikill léttir. Þetta er bara búið.“

Traust Erlu á íslenskum dómstólum er löngu farið fyrir bí. „Þetta er auðvitað ótrúlegt. Ég er dæmd þrisvar og þrisvar sinnum kemst Mannréttindadómstóllinn að þeirri niðurstöðu að þetta hafi ekki verið réttlátt.“

Blaðakonan hafði sjálf ekki náð að lesa dóminn í heild sinni.




Fleiri fréttir

Sjá meira


×