Innlent

Er óhætt að láta lita á sér hárið?

Hrund Þórsdóttir skrifar
Norsku neytendasamtökin hafa sent frá sér tilkynningu þar sem fólk er varað við því að lita á sér hárið. Samtökin efnagreindu 12 hárliti sem allir reyndust innihalda öfluga ofnæmisvalda auk þess sem hormónaraskandi efni fundust í tíu þeirra. Þau benda á að þrói fólk með sér ofnæmi fyrir hárlitum hverfi það aldrei og geti versnað sé notkun haldið áfram. Sérstaklega er varað við því að börn og konur sem ganga með börn eða eru með börn á brjósti, láti lita hár sitt.

Ofnæmissérfræðingur sem við ræddum við í dag segir ekki ástæðu til að óttast hárlitun. Allar snyrtivörur geti valdið ofnæmisviðbrögðum en hættan sé ekki meiri í tengslum við hárliti en annað. En hvað skyldi hárgreiðslufólk hafa um þetta að segja?

„Eins og með lyf, þá fer litur líka á húðina að minnsta kosti í einhverjum tilfellum og að sjálfsögðu fer hann þá eitthvað inn í blóðrásina,“ segir Ævar Österby, einn eigenda Slippsins hárgreiðslustofu.

Fyrir átta árum var kona Ævars ólétt og sóttu þau foreldranámskeið í Kaupmannahöfn. „Ljósmæðurnar sögðu mér þá, ég tek þó fram að þær hafa skipt um skoðun síðan, að það væri ekki sannað að hárlitir myndu skaða fóstur á nokkurn hátt en þá fór ég að velta fyrir mér hvort það væri nokkuð búið að afsanna það,“ segir Ævar.

Í kjölfarið mótaðist afstaða hans. „Ég reyni eins og ég get að komast hjá því að lita óléttar konur eða konur sem eru með barn á brjósti og ef ég geri það vil ég helst setja litinn í álpappír en ekki á húðina,“ segir hann.

Ævar minnir á að hingað til lands komi engir litir nema Evrópusambandið hafi samþykkt þá en segir mikilvægt að leita til fagfólks.

Litar þú á þér hárið?

„Nei, ég reyni að vera ekki of fallegur og sleppi því,“ segir Ævar að lokum.




Fleiri fréttir

Sjá meira


×