Innlent

Engin mengun mælist í vatnsveitu Súðvíkinga

Atli Ísleifsson skrifar
Íbúar Súðavíkur voru beðnir um að sjóða allt neysluvatn í varúðarskyni.
Íbúar Súðavíkur voru beðnir um að sjóða allt neysluvatn í varúðarskyni.
Ný sýni sem tekin voru í morgun benda til að enga mengun sé að finna í vatnsveitu Súðavíkur. Fyrr í vikunni barst tilkynning frá Heilbrigðiseftirliti Vestfjarða um að E. coli mengun hefði fundist í vatnssýni við hefðbundið eftirlit.

Í tilkynningu frá sveitarstjóra Súðavíkur segir að vatnssýnið hafi verið staðbundið og haft nokkuð veikt gildi.

„Í kjölfarið sendi sveitarfélagið út tilkynningu til að gæta fyllstu varúðar og öryggis um að nauðsynlegt væri að sjóða neysluvatn á meðan mengunin væri rannsökuð betur og komið í veg fyrir hana. Þá óskaði sveitarfélagið eftir því að seinni sýni yrðu tekin víðavegar um bæinn, í gömlu byggð Súðavíkur og þeirri nýrri.

Í morgun leiddu seinni sýni í ljós að enga mengun er að finna í vatnsveitu Súðavíkur. Ljóst er að mengunin var staðbundin og hefur þegar verið brugðist við henni. Verður fylgst með staðnum í kjölfarið með tilliti til þessa.

Vatnsveita Súðavíkur sækir neysluvatn úr borholu og hefur í gegnum tíðina mælst í miklum gæðum. Þar hefur aldrei mælst mengun.

Síðustu dagar hafa verið afar lærdómsríkir fyrir sveitarfélagið. Sveitarfélagið tók þá ákvörðun að senda hiklaust út tilkynningu varðandi mögulega mengun, þó svo um væri að ræða staðbundið fyrra sýni.  Það gerir sveitarfélagið öðru fremur af ábyrgð við íbúa og fyrirtæki á svæðinu.

Þá hafa síðustu dagar einnig leitt ljós hversu skilvirku og góðu eftirliti Heilbrigðiseftirlit Vestfjarða sinnir.  Það er mikið öryggi fólgið í því að hafa virkt eftirlit með grunnstoðum samfélags, eins og vatnsveita er. Síðustu dagar hafa leitt í ljós að það eftirlit virkar vel í Súðavík,“ segir í tilkynningunni.


Tengdar fréttir




Fleiri fréttir

Sjá meira


×