Elfar Freyr: Þjálfarinn vildi ekki fá mig
MYND / WWW.AEKFC.GR
Mikil óvissa er um stöðu leikmanna hjá AEK. Félagið glímir við mikil fjárhagsvandræði og nýjustu fregnir herma að óvíst sé hvort liðið spili í efstu deild í Grikklandi á næstu leiktíð.
„Þetta er bölvað basl. Ég veit ekki einu sinni hvenær ég á að byrja að æfa aftur," segir Elfar aðspurður um nýjustu tíðindi úr herbúðum gríska liðsins. Hann segist vera laus allra mála verði félaginu vikið úr efstu deild og telur að það sama gildi um flesta leikmenn liðsins.
Elfar Freyr gekk til liðs við AEK frá Breiðabliki fyrir tæpu ári síðan. Hann hefur þó nánast eingöngu vermt varamannabekk inn hjá gríska liðinu.
„Ég ætla ekki að segja að það hafi verið erfitt. Það hefur eiginlega verið of létt," segir Kópavogsbúinn kíminn og vorkennir sjálfum sér greinilega ekki þrátt fyrir lítinn spiltíma.
„Lífið er alltaf gott en auðvitað snýst þetta um að spila. Ég bað um að fá að fara á lán en það klikkaði," segir Elfar sem stóð til boða að spila á Norðurlöndunum. Þjálfarinn neitaði honum hins vegar um að fara.
Þjálfarinn vildi ekki fá mig
Miðað við það uppsteit sem varð við félagaskiptin reiknuðu flestir með því að Elfari Frey væri ætlað stórt hlutverk hjá gríska liðinu. Annað hefur komið á daginn.
„Það var ekki þjálfarinn sem vildi fá mig heldur meðlimir í stjórninni," segir Elfar og bætir við að þjálfarinn hafi verið eitt stórt spurningamerki.
„Hvaða gæi er þetta eiginlega?" grínast Elfar Freyr sem líkar vistin í Grikklandi þrátt fyrir allt ágætlega.
AEK skipti um þjálfara á tímabilinu og sá þjálfari er nú einnig farinn frá félaginu.
„Nú leita þeir að nýjum þjálfara en ég veit ekki á hverju þeir hafa efni," segir Elfar Freyr sem leiðist ekki lífið á Íslandi þessa dagana.
Blikar hafa skilað mörgum leikmönnum í atvinnumennsku undanfarin ár. Nokkrir þeirra eru nú sameinaðir á ný, í sumarfríi og má vænta að gæðin á æfingum Blika hafi ekki minnkað við komu þeirra.
