Eldur í spænskri ferju

Eldur kviknaði í spænsku ferjunni Sorrento síðdegis í dag með 150 innanborðs. Ferjan var á leið frá Palma á Mallorca til Valensía á Spáni þegar eldurinn kviknaði í bílaþilfari hennar. Þrjá skipverja sakaði þar af einn alvarlega.

Eldurinn varð fljótt stjórnlaus og urðu því allir farþegar að hraða sér í björgunarbáta og þaðan í ferju sem tók á móti þeim. Þyrla sótti hina slösuðu en þeir fóru síðastir frá borði.

Orsök eldsvoðans er enn ókunn en ekki er talið að ferjunni verði bjargað úr þessu.