Skoðun

EkkiMinnRáðherra

Rakel Sölvadóttir skrifar
Nýverið tilkynnti menntamálaráðherra að afhenda ætti öllum börnum í 6.-7. bekk forritanlegar örtölvur að gjöf. Frábært verkefni að fyrirmynd frá Bretlandi sem unnin var í samvinnu við BBC. Að verkefninu hér á landi standa menntamálaráðuneytið, Samtök iðnaðarins, Menntamálastofnun og Krakka RÚV.

Frábært verkefni ef haldið er rétt á spöðunum. Krakkar fá tæki í hendur og RÚV setur upp verkefnasíðu og skemmtilegt efni til stuðnings. En hvað gleymdist? Voru skólar og kennarar undirbúnir? Nei. Samt áttu skólarnir að sækja um græjurnar fyrir nemendur. Samt eru hafnir forritunarleikar tengdir græjunni. Mér finnst enn og aftur verið að gera lítið úr starfi kennara og þeirri skipulagningu og undirbúningi sem felst í kennslu. Eiga kennarar alltaf að hlaupa upp til handa og fóta án fyrirvara þegar ráðherra þarf að fá jákvæða athygli út á við? Eiga kennarar að lengja vinnudaginn til að styðja við verkefnið án þess að fá greitt fyrir það? Ef kennarar gera það ekki fá þeir skammir frá foreldrum fyrir að vera ekki að nýta þetta frábæra tæki í kennslu STRAX.

Ég þarf ekkert að skafa utan af því að Illugi er ekki og hefur ekki verið minn ráðherra. Honum hefur tekist að hrinda af stað verkefnum sem virðast frekar snúa að eigin hagsmunum og með það að leiðarljósi að reyna að fegra hann út á við heldur en að gæta hagsmuna barnanna okkar og styðja við skólakerfið. Hver man ekki eftir „fræga“ lestrarátakinu sem var hent út með laginu hans Bubba með nýjum texta og myndbandi í stíl! Ráðherra blés sig síðan út með heimsóknum um landið til að kynna átakið sem átti aldeilis að bjarga lestri barnanna okkar. Eins og svo oft áður þá gleymdi ráðherra að ráðfæra sig við skóla og kennara og hafa meðfylgjandi fjármuni og markvissa áætlun, efni og þjálfun til að fylgja eftir. Í það minnsta að hafa tengingu við nýja aðalnámskrá. En þess virðist greinilega ekki þurfa þegar fókusinn er að slá ryki í augun á almúganum, þykjast vera að vinna vinnuna sína og allt þetta á kostnað kennara. Hver fær jú skammirnar þegar börnin hafa ekki bætt sig í lestri? Kennararnir og skólarnir.

Er ekki kominn tími til að kennarar og nemendur séu metnir meira en athygli eins ráðherra?




Skoðun

Skoðun

Er þetta eðli­legt?

Guðrún Árnadóttir,Guðrún Tara Sveinsdóttir,Hekla Kollmar,Þorgerður Jörundsdóttir skrifar

Sjá meira


×