Innlent

Ekki ráðist að rót vandans með því að hafa tvo í flugstjórnarklefanum öllum stundum

Sunna Kristín Hilmarsdóttir skrifar
Bæði Icelandair og Wow Air hafa tekið upp þá vinnureglu upp í flugi að aldrei séu færri en tveir úr áhöfn í flugstjórnarklefanum.
Bæði Icelandair og Wow Air hafa tekið upp þá vinnureglu upp í flugi að aldrei séu færri en tveir úr áhöfn í flugstjórnarklefanum. Vísir/Getty/Valli
Jón Þór Þorvaldsson, varaformaður Félags íslenskra atvinnuflugmanna, segist ekki vera viss um hvað sé hægt að gera til að koma í veg fyrir að flugslys líkt því og varð í frönsku Ölpunum fyrir viku síðan endurtaki sig.

„Ég held að þetta sé svona spurning sem við spyrjum okkur öll. Auðvitað er gríðarlegur þrýstingur frá samfélaginu að fá svör sem fyrst þegar svona hrikalegir atburðir gerast og þeirri þörf verður aldrei fullnægt,“ segir Jón Þór.

Hann minnir á að rannsókn sé ekki lokið á slysinu.

„Það sem truflar mann svolítið í þessu er að það er farið svo hratt í það að stökkva á einhverja niðurstöðu. Það er ekki búið að rannsaka slysið, við vitum ekki að fullu hvað gerðist.“

Spyr sig hvers vegna lá svo mikið á að upplýsa um hvað gerðist

Jón Þór segir að allir rökhugsandi menn hljóti að spyrja sig hvers vegna franski saksóknarinn kom svo snemma fram með þá afgerandi afstöðu að aðstoðarflugmaðurinn Andreas Lubitz hafi flogið viljandi á fjallið.

„Maður getur svo sem giskað á hvers vegna hann gerði það. Til dæmis féllu Airbus-hlutabréfin strax daginn eftir og það liggur mikið á að vita að það hafi ekki verið vélbúnaðurinn sem klikkaði. Þetta eru náttúrulega getgátur en maður lætur sér detta þetta í hug.“

Þá minnir hann á að í þessu, jafnt sem öðru, þurfi allir að vinna eins og fagfólk.

„Í þessu tilfelli gefur saksóknari í Marseille í Frakklandi eitthvað út eftir ónefndum rannsakanda sem er hermaður á slysstað. Þetta eru í rauninni óstaðfestar fregnir sem eru síðan bara látnar út. Sjálfsagt eru líkurnar þær að þetta hafi verið eins og við höfum séð í fjölmiðlum en engu að síður þá er spurningin hvort þetta eru réttar upplýsingar.“

Íslensku flugfélögin Icelandair og WOW air hafa nú breytt reglum sínum og verða nú alltaf að vera tveir áhafnarmeðlimir í flugstjórnarklefanum, ef annar flugmaðurinn bregður sér frá. Aðspurður hvað honum finnist um það segir Jón Þór:

„Ég held að þetta sé svolítið ákall gagnvart samfélaginu og að það sé ekki verið að ráðast á rót vandans.“


Tengdar fréttir

„Opnaðu helvítis dyrnar!“

Afrit af samtali aðstoðarflugmannsins Andreas Lubitz við flugstjóra flugvélar Germanwings hefur verið birt í þýska dagblaðinu Bild am Sonntag.

Flugmenn koma Lubitz til varnar

Samband atvinnuflugmanna í Þýskalandi segir ótímabært að staðhæfa um aðgerðir Lubitz án hins svarta kassans.




Fleiri fréttir

Sjá meira


×