Innlent

Ekkert stöðvar flóttann til Evrópu

Una Sighvatsdóttir skrifar
Hundruð flóttamanna eru lögð af stað fótgangandi gegnum Ungverjaland, eftir að hafa beðið dögum saman á lestarstöðinni í Búdapest. Sameinuðu þjóðirnar segja að runnin sé upp örlagastund fyrir Evrópu.

Fólkið ætlar gangandi til Austurríkis, um 240 kílómetra leið. Stjórnvöld í Ungverjalandi hafa reynt að hindra för þúsunda til Vestur-Evrópu og samþykktu í dag hert lög sem veita m.a. lögreglu aukna heimild til valdbeitingar gegn flóttafólki. Táragasi var beitt í flóttamannabúðum í bænum Röszke, þar sem verið er að reisa háa girðingu á landamærum Ungverjalands við Serbíu.



Ungverska lögreglan stendur vörð við fllóttamannabúðirnar í Roszke skammt frá landamærunum við Serbíu
Ekkert virðist hinsvegar stöðva flóttann til Evrópu. Tyrkneska strandgæslan stöðvaði í dag för 57 flóttamanna sem reyndu að komast sjóleiðina til grísku eyjarinnar Kos. Ljósmynd af barnungum dreng sem drukknaði á sömu leið fyrir nokkrum dögum virðist engin áhrif hafa. Drengurinn, Aylan Kurdi, var borinn til grafar í Sýrlandi í dag ásamt bróður sínum og móður. Faðirinn, Abdullah Kurdi, sagðist vona að dauði fjölskyldu hans hreyfi við Arabaríkjum.



„Ég vil að ríkisstjórnir Arabaríkja – ekki Evrópuríkja – sjái hvað kom fyrir börnin mín, og það verði til þess að þau komi fólki til hjálpar. Það er það eina sem ég vil. Öll fjölskylda mín dó. Þau eru píslarvottar núna, en ég vona að dauði þeirra verði til þess að þeir sem enn eru nauðstaddir sé hjálpað. Það er komið nóg af þessu stríði. Ég veit ekki hvað meira ég get sagt. Ég er svo þreyttur, látið mig bara í friði í guðs nafni,“ sagði Kurdi við fjölmiðla eftir jarðarförina í dag.

Yfirmaður Flóttamannastofnunar Sameinuðu þjóðanna, Antonio Guterres, segir að um örlagastund sé að ræða fyrir Evrópu, sem verði að koma sér saman um áætlun um að taka við minnst tvö hundruð þúsund manns.




Fleiri fréttir

Sjá meira


×