Handbolti

Einkunnir strákanna okkar: Bjarki Már og Arnór bestir

Björgvin Páll var frábær í fyrri hálfleik.
Björgvin Páll var frábær í fyrri hálfleik. vísir/epa
Strákarnir okkar í handboltalandsliðinu töpuðu með minnsta mun, 25-26, fyrir Slóveníu í B-riðli heimsmeistaramótsins í dag.



Eftir hvern leik íslenska liðsins munu íþróttafréttamenn 365 gefa leikmönnum og þjálfaranum einkunnir.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Einkunnir Íslands gegn Slóveníu:

Björgvin Páll Gústavsson - 4

Var mjög góður í fyrri hálfleik og heilt yfir mjög góður leikur hjá honum. Fékk á sig erfið færi síðari hluta leiksins. Ekki við hann að sakast.

Guðjón Valur Sigurðsson - 3

Fyrirliðinn var í nýju hlutverki. Kom inn á til að taka vítaköst á ögurstundu. Skoraði úr þremur af fjórum. Ástæðulaust að kvarta yfir því.

Ólafur Guðmundsson - 4

Ólafur var frábær varnarlega. Hafði stóru hlutverk að gegna í hjarta varnarinnar. Honum voru mislagðar hendur í sókninni en fær plús fyrir að halda áfram að reyna.

Janus Daði Smárason - 3

Byrjaði leikinn. Fann línuna og var með gott flot á leiknum. En fljótlega kom í ljós að sviðið var of stórt fyrir hann. Hins vegar engin ástæða til örvænta. Hans er framtíðin.

Rúnar Kárason - 4

Byrjaði ekki vel og reyndi hluti sem honum eru ekki eðlislægir. En vann sig vel inn í leikinn og sýndi hvers hann er megnugur þegar hann kom beint á vörnina og lét vaða á markið. Það er hans leikur.

Arnór Þór Gunnarsson - 4

Allt annað sjá til hans en í leiknum gegn Spáni. Var ákafur og áræðinn en líður fyrir það að stuðlarnir finna hann ekki í horninu. Þar af leiðandi vantar hann mörk af teig.

Kári Kristján Kristjánsson - 2

Kári var í miklum vandræðum allan leikinn. Varnarmenn Slóvena voru með hann heljargreipum og útilínan átti í erfiðleikum með að finna hann á línunni.

Ásgeir Örn Hallgrímsson - 2

Skilar alltaf sínu í vörninni og er ómissandi þar. En í sókninni hefur hann ekki fundið fjölina sína. Við getum ekki endalaust skrifað það á litla leikæfingu. Ásgeir á mikið inni.

Arnar Freyr Arnarsson - 3

Var ekki í eins stóru hlutverki og hann var í gegn Spáni. Samt ótrúlegt að fylgjast með þessum unga manni jafnt í vörn sem sókn. Skorti reynslu í sókninni í dag en það kemur með tímanum.

Arnór Atlason - 5

Kom leiks þegar stundarfjórðungur var liðinn af leiknum. Með tilkomu hans gjörbreyttist leikur íslenska liðsins, þó ekki fyrr en í seinni hálfleik. Setti leikinn upp og vissi nákvæmlega hvað átti að spila. Skoraði fjögur mörk úr jafnmörgum skotum. Gerði auðvitað afdrifarík mistök undir lokin.

Guðmundur Hólmar Helgason - 4

Frábær leikur hjá Akureyringnum eins og gegn Spáni. Það hefur gert honum gott að leika í einni sterkustu deild heims. Hefur sýnt miklar framfarir.

Gunnar Steinn Jónsson - 3

Í erfiðu hlutverki, er hins vegar skynsamur og hjálpar liðinu. Það er lítil skotógn af Gunnari og yfirfintuna til vinstri lesa menn eins og opna bók.

Ómar Ingi Magnússon -

Spilaði ekki neitt.

Aron Rafn Eðvarðsson - 2

Spilaði ekki mikið. Hefði hugsanlega mátt koma fyrr inn þegar Björgvin Páll var farinn að þreytast og gefa eftir. Og kannski var Aron of lengi inn á loksins þegar hann fékk tækifærið.

Bjarki Már Elísson - 5

Var besti leikmaður íslenska liðsins. Nýtti færin sín frábærlega. Gríðarlega öflugur af teig. Les leikinn vel. Án nokkurs vafa framtíðarmaður og erfitt að taka stöðuna af honum, jafnvel þótt þú heitir Guðjón Valur.

Geir Sveinsson - 4

Varnarleikurinn var frábær hjá íslenska liðinu og í hans anda. Var fljótur að bregðast við þegar sóknin gekk illa. Líður fyrir það hvað breiddin í liðinu er lítil. Rúllar vel á liðinu. Gagnrýndur fyrir að setja Ómar Inga Magnússon ekki inn en í fyrstu tvo leikina hafði hann ekkert að gera. Hans tækifæri er handan við hornið.

Útskýring á einkunnum:

6 - Heimsklassa frammistaða

5 - Frábær frammistaða

4 - Góð frammistaða

3 - Sæmileg frammistaða - skilaði sínu

2 - Ekki nógu góð frammistaða

1 - Slakur leikur


Tengdar fréttir

Arnór: Síðasti tapaði boltinn situr í mér

"Það er svolítið vonleysi og svekkelsi núna,“ segir Arnór Atlason sem átti magnaðan leik fyrir Ísland í kvöld. Stýrði sóknarleik íslenska liðsins af myndarskap og öll fjögur skot hans fóru í markið.

Vujovic: Framtíð íslenska liðsins er björt

"Ég veit ekki hvað skal segja,“ sagði þjálfari Slóvena, Veselin Vujovic, gjörsamlega búinn á því eftir hinn magnaða leik Íslands og Slóveníu í dag. Drengir Vujovic skriðu út úr höllinni með tvo punkta en það hefði ekki verið mjög ósanngjarnt ef Ísland hefði fengið annað stigið.

Ólafur: Höfum ekki tíma til að svekkja okkur

„Við vorum ekkert langt frá þessu, vorum inn í leiknum allan tímann og þetta hefði getað dottið báðum megin,“ segir Ólafur Guðmundsson, leikmaður íslenska landsliðsins, eftir svekkkjandi tap gegn Slóvenum á HM í handbolta í Frakklandi.

Bjarki: Líður alltaf vel er ég spila handbolta

Bjarki Már Elísson er búinn að bíða lengi eftir sínu fyrsta tækifæri á stórmóti og það kom frekar óvænt í dag. Óhætt er að segja að Bjarki hafi nýtt tækifærið vel því hann fór á kostum gegn Slóvenum.




Fleiri fréttir

Sjá meira


×