Fótbolti

Einfættur áhorfandi skoraði mark mánaðarins í skoska boltanum | Myndband

Tómas Þór Þórðarson skrifar
Tommy McKay með sigurlaunin.
Tommy McKay með sigurlaunin.
Tommy McKay, einfættur stuðningsmaður Dundee United í skosku úrvalsdeildinni í fótbolta, skoraði mark mánaðarins í nóvember að mati aðdáenda deildarinnar sem tóku þátt í að kjósa flottasta markið.

McKay var vitaskuld ekki að spila en hann tók þátt í áskorun í hálfleik á leik Dundee og Dunfermline í byrjun nóvember þar sem hann vippaði boltanum skemmtilega yfir markvörðinn fyrir utan vítateig.

Þessi 32 ára gamli fótboltaáhugamaður missti fótinn sem barn þegar þurfti að fjarlægja hann vegna krabbameins. Hann spilar reglulega fótbolta með sambandi limalausra fótboltamanna í Skotlandi.

McKay hafði betur í kosningu gegn leikmönnum á borð við Jayden Stockley hjá Aberdeen og Tom Rogic, leikmanni meistaraliðs Celtic. McKay fékk 80 prósent atkvæða og rúllaði yfir kosninguna.

Fleiri milljónir hafa séð markið á Facebook-síðu skosku úrvalsdeildarinnar og á Youtube en þetta fallega mark má sjá hér að neðan.




Fleiri fréttir

Sjá meira


×