Eigandi gæludýraverslunar sakaður um slæma meðferð á dýrum

„Ég þekki þennan bransa mjög vel og þetta ástand er víða,“ segir Árni Stefán Árnason lögfræðingur í samtali við Vísi en Árni hefur sérhæft sig í málum á sviði dýravelferðar og mannréttinda. Árni birti í dag á Facebook síðu sinni myndir af skelfilegum aðbúnaði dýra sem hann hafði fengið sendar frá starfsmanni gæludýraverslunar á höfuðborgarsvæðinu.

Verslunin sem um ræðir er Dýraríkið Holtagörðum. Konan hafði unnið þar í afleysingum og sagði farir sínar ekki sléttar af samskiptum sínum við eiganda verslunarinnar. Myndirnar sýna meðal annars það sem virðist vera særður naggrís og páfagaukur. Naggrísinn hafði nýlega gotið og segir Árni að starfsfólki hafi verið meinað að fara með hann til dýralæknis og hann að lokum drepist.

Konan sem sendi Árna myndirnar vildi ekki koma fram undir nafni en sendi Árna bréf sem hann birtir einnig á vefnum. Það auk allra myndanna má sjá neðst í fréttinni.

Rétt að svipta eigandann umráðarétti

„Ég fékk þetta skeyti frá konunni og ákvað að hitta hana í morgun og eftir að hafa hitt hana og heyrt hennar sögu ákvað ég að birta myndirnar. Ég sá þennan ömurlega aðbúnað og hreinlega gat ekki þagað yfir því. Það sem skiptir mig máli er að koma þessu á framfæri þannig að eftirlit með umráðamönnum dýra verði hert,“ segir Árni.

Eftirlit með umráðamönnum dýra er á höndum Matvælastofnunar. Hafi fólk grun um illa meðferð á dýrum getur það sent inn nafnlausa ábendingu á vef MAST. Þegar það hefur verið gert sendir stofnunin þeim sem kvörtunin beinist gegn bréf og upplýsir hann um stöðu mála. Sá hefur síðan fjórar vikur til að koma sínu sjónarmiðum á framfæri.

„Ég trúi sögu starfsmannsins og þetta er ekki í fyrsta skipti sem ég heyri af vanköntum hjá eiganda þessarar verslunar. Samkvæmt myndunum og sögunni þá virðist þetta vera þannig aðstaða að réttast væri að maðurinn væri sviptur vörslu dýranna á meðan rannsókn stendur yfir,“ segir Árni. „Það er allt of algengt að menn séu með verslanir og hafi allt voða flott og fínt í henni en baka til sé aðbúnaður dýra ömurlegur.“

Hann segir lögin og reglugerðirnar í gildi ekki vera nógu góð. Eins og er sé MAST eini aðilinn sem getur ákveðið hvort hægt sé að kæra mál er varða slæma umhirðu dýra til lögreglu. „Það er því duttlungum eftirlitsmanna hjá MAST háð hvort þeir kanna málið eður ekki. Á þeim tíma sem ég hef fylst með þessum málum þá hefur afgreiðsla mála hjá þeim verið hæg og nánast engin. Sjálfur myndi ég vilja sjá setta á fót dýralögreglu líkt og þá sem var sett á fót í Þrándheimi í Noregi og hefur gefið góða raun þar,“ segir Árni.

Kvartanir aldrei átt við rök að styðjast

„Það er svo skrítið og skelfilegt hvernig fólk er tilbúið að láta allskonar drullu um náungann vaða,“ segir Gunnar Vilhelmsson eigandi gæludýraverslunarinnar Dýraríkisins til 36 ára. Hann vísar öllum ásökunum á hendur sér um slæma meðferð á dýrum alfarið á bug.

„Við höfum verið í fjölda ára að byggja upp þá ímynd að okkur sé ekki sama um dýrin og á einum degi er það bara sprengt í kaf í einhverjum múgæsingi. Ég veit eiginlega ekki hvað ég á að gera, er rétt að fara í meiðyrðamál? Það er svo erfitt að þrífa skítinn af þegar fólk hefur kastað honum,“ segir hann.

Gunnar segir rétt að kvartað hafi verið yfir meðferð á naggrísnum á myndunum og þær upplýsingar hafa einnig fengist staðfestar hjá MAST. Hann segir að í gegnum tíðina hafi verið kvartað yfir meðferð á dýrum hjá þeim en þær kvartanir hafi aldrei átt sér neina stoð í raunveruleikanum. „Það kom stúlka frá MAST áðan til að athuga hvort það væri ekki allt í lagi. Þær litlu aðfinnslur sem þau höfðu sneru að mestu leyti að verkþáttum sem þessir starfsmenn áttu að viðhafa.“

Reynir að hugsa um dýrin eins og væru þau börn sín

Aðspurður um naggrísinn blóðuga á myndinni segir Gunnar það rétt að hann hafi tekið fyrir það farið yrði með dýrði til dýralæknis. Dýrið hafi átt í vandræðum með got og hafi á endanum gotið tveimur andvana ungum. Er hann fékk símtalið frá starfsmönnunum hafi hann stokkið til og kíkt í búðina til að líta á það.

„Þetta eru í raun svipuð viðbrögð og hjá bónda að taka á móti lambi. Þarna voru ungarnir dauðir, fylgjan hafði skilað sér, blæðingarnar hættar og ég sagði við starfsfólkið að það væri ekkert sem dýralæknir gæti gert sem við gætum ekki gert,“ segir Gunnar. Það þyrfti að passa upp á að dýrið fengi nóg vatn og fylgjast með því þar sem það hefði misst mikið blóð. „Það var gert og hún hefur það ágætt í dag.“

Gunnar segir að hann reyni að hugsa um dýrin eins og ef þau væru börnin hans. Hann tekur dæmi um að hann myndi ekki stökkva og fara með barn til læknis sökum þess að það hnerri. Þegar það sé hins vegar fárveikt eða víðs fjarri sjálfu sér þá stökkvi hann af stað með það. Hið sama megi segja um dýrin, hann fer ekki með þau til dýralæknis nema brýna nauðsyn beri til.

Öll dýr eiga að fá séns

„Ég vil alltaf gefa dýrunum séns,“ segir Gunnar. „Ég átti einu sinni schäffer hund sem varð fimmtán ára. Síðustu tvö árin var hann gigtveikur en ég gaf honum verkja- og gigtarlyf. Var það rangt af mér? Hefði ég frekar átt að svæfa hann? Er ég vond manneskja fyrir að gefa dýri tvö auka ár?“

Í öðrum þræði á Facebook, í hópnum Hundasamfélagið, er talað um að eigendur verslunarinnar hafi stundað það að svæfa dýr með klóróformi og að starfsfólk hafi verið rekið fyrir að þrífa búrin of oft. Árni Stefán hefur einnig birt myndir á Facebook síðu sinni sem eiga að sýna hömstrum lógað með klóróformi í téðri verslun.

„Á árum áður, þegar það mátti, þá svæfðum við dýr með klóróformi líkt og bændur áttu það til að slátra heima. Það höfum við ekki gert í mörg, mörg ár og ekki frá því að það var bannað. Það er einfaldlega ekki satt að við höfum gert þetta,“ segir Gunnar. 

Gunnar segir mikilvægt að fræða fólk um dýr og meðferð á þeim. Það skipti hann máli, ekki vegna einhverjar ímyndar heldur fyrst og fremst fyrir sjálfan sig, að hann hugsi vel um dýr og að þeim líði vel. Í gegnum tíðina hafi hann reynt að koma ábendingum til fólks um hvað sé rétt og hvað sé rangt í umhirðu dýra.

„Þess vegna finnst mér þetta svo skelfilegt. Hvers vegna ætti fólk að taka mark á mér ef það heldur að ég sé dýraníðingur? Ég hef helgað mínu lífi því að annast dýr og ég veit eiginlega ekki hvað ég á að gera núna,“ segir Gunnar.

Vilhelm Gunnarsson, ljósmyndari Fréttablaðsins og Vísis, fór áðan í Dýraríkið í Holtagörðum og fékk að skyggnast um bak við í búðinni. Ljósmyndirnar sem hann tók í ferðinni má sjá í fréttinni og hér að neðan. 

Er þetta boðlegt í bakherbergjum gæludýraverslunar á Íslandi

Posted by Árni Stefán Árnason on Friday, 4 September 2015

Er þetta boðlegt í dýraverndarlandi? - NEIBarst eftirfarandi póstur í kvöld.- Hér á að vera starfandi svokallað Dý...

Posted by Árni Stefán Árnason on Thursday, 3 September 2015