Innlent

Dýraverndarsinnar safna liði til að hreinsa víraflækjur

Erla Hlynsdóttir skrifar
Það sem af er ári hefur vír verið losaður af þremur pörum hreindýrstarfa og af ellefu stökum dýrum til viðbótar.
Það sem af er ári hefur vír verið losaður af þremur pörum hreindýrstarfa og af ellefu stökum dýrum til viðbótar. Mynd úr safni /Vilhelm
Hreindýrstarfarnir tveir sem voru fastir saman með vírhönk á hornunum eru lausir hvor frá öðrum eftir að annar þeirra felldi hornin. Vírinn er enn fastur á hinum tarfinum. Dýraverndarsinnar hyggjast fylkja liði á svæðið og fjarlægja víraflækjur.

Tarfarnir við Flatey á Mýrum höfðu verið fastir saman í rúma viku, hið minnsta. Umhverfisstofnun vildi ekki grípa til aðgerða þar sem þeir virtust báðir ná að nærast og hreyfa sig, auk þess sem talið var að þeir myndu brátt fella hornin. Annar þeirra felldi síðan hornin í gær.

Tarfurinn sem eftir stendur með víraflækju á hornunum verður undir eftirliti en á meðan vírinn særir hann ekki eða hindrar hann í hreyfingum verður hann látinn óáreittur.

Árni Stefán Árnason, lögfræðingur sem er sérhæfður í dýrarétti, segir að það sem af er ári hafi vír verið losaður af þremur pörum hreindýrstarfa og af ellefu dýrum til viðbótar.

„Það sem veldur okkur dýraverndarsinnum áhyggjum eru þessar girðingar sem liggja ennþá á þessu umrædda landi þar sem þessir tveir tarfar flæktust saman, skuli vera þar áfram. Af þessu stafar ógn fyrir dýrin og þetta er hvort tveggja í senn, brot á girðingalögum og dýraverndarlögum og þessu þarf að kippa í liðinn, helst bara án tafar," segir hann.

Árni segir dýraverndarsinna ætla að safna liði og fara á Flatey í Mýrum til að hreinsa þar víraflækjur og fjarlægja skemmdar girðingar. Samkvæmt upplýsingum frá staðkunnugum eigi það ekki að vera mikið mál.

Spurður af hverju það hefur þá ekki verið gert fyrir löngu, segir Árni: „Það er vegna þess að það virðist vera einhver stirðleiki í samskiptum á milli þeirra aðila sem eiga að koma að þessum málum, það er á milli bænda, sveitastjórnar Hornafjarðar og Umhverfisstofnunar, samkvæmt mínum bestu upplýsingum. Það er auðvitað eitthvað sem þeir þurfa líka að leysa sín á milli."

Árni hvetur áhugasama sjálfboðaliða til að hafa samband með því að senda póst á velferdbufjar@lifraen.is







Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×