Innlent

Dalamenn bjóða nágrönnunum upp í dans

Jón Sigurður Eyjólfsson skrifar
Dalamenn virðast til í að fara í eina sæng með Strandamönnum og Reykhólamönnum.
Dalamenn virðast til í að fara í eina sæng með Strandamönnum og Reykhólamönnum. MYND/GAG
Sveitarstjórn Dalabyggðar óskar eftir fundi með sveitarstjórnum Strandabyggðar og Reykhólahrepps á haustmánuðum með það fyrir augum að kanna möguleikana á sameiningu sveitarfélaganna þriggja.

Þetta var samþykkt á síðasta sveitarstjórnarfundi en þá voru líka lagðar fram niðurstöður skoðanakönnunar sem gerð var jafnhliða sveitarstjórnarkosningunum í vor. Bera þær með sér sameiningarfýsi Dalamanna. Sams konar könnun var gerð í Reykhólahreppi en þar var mjótt á munum, sameiningarmenn voru þó fjórum fleiri.

Engin slík könnun hefur farið fram í Strandabyggð. „Hér er fólk mjög opið fyrir öllum möguleikum,“ segir Andrea Kristín Jónsdóttir, sveitarstjóri Strandabyggðar. Hún segir enn fremur að sveitarstjórn Dalabyggðar hafi sent þeim niðurstöður skoðanakönnunarinnar. Engin ákvörðun hefur verið tekin um að kanna hug Strandamanna en Andrea Kristín segir þessi mál verða rædd. Hún segir enn fremur að nýr vegur yfir Þröskulda hafi breytt miklu fyrir Hólmavík og nágrenni sem sé nú í hjarta Vestfjarða eftir lagningu vegarins.

Karl Kristjánsson, oddviti sveitarstjórnar Reykhólahrepps, segir að málið gæti orðið þungt þar í sveit þar sem svo naumur meirihluti sé fyrir því. Hann segist þó sjálfur ver frekar hlynntur sameiningu. Sveinn Pálsson, sveitarstjóri Dalabyggðar, segir að ef nágrannarnir tveir fáist upp í þennan vagn verði það tilkynnt yfirvöldum sem þá geti haft milligöngu um framgang mála.

Eitt af því sem breytast myndi í Reykhólahreppnum við slíka sameiningu er persónukjörið sem þar er viðhaft en Karl segir á því bæði kosti og annmarka. Í slíku fyrirkomulagi eru allir íbúar í kjöri svo það fylgir því í raun þegnskylda að verða kosinn til ábyrgðar. Sá er setið hefur í sveitarstjórn eitt kjörtímabil á þó kost á því að skorast undan að sitja það næsta. Allir í síðustu sveitarstjórn nýttu sér þann kost. Karl hefur áður setið í sveitarstjórn og þekkir því til starfans. Hann segir að ákvörðun fyrri stjórnarmanna geti hugsanlega stafað af því að starfinu fylgi álag sem er síðan ekki í samræmi við laun sem hann segir lág. „En hins vegar tel ég að það geti verið hollt fyrir íbúa að finna með svo áþreifanlegum hætti til samfélagsábyrgðarinnar,“ segir hann. 




Fleiri fréttir

Sjá meira


×