Íslenski boltinn

Daði: Kominn smá stöðugleiki í liðið

Ingvi Þór Sæmundsson skrifar
Daði Guðmundsson býr yfir mikilli reynslu.
Daði Guðmundsson býr yfir mikilli reynslu. Vísir/Arnþór
Fram sækir Breiðablik heim í miklum fallslag í Pepsi-deild karla í kvöld. Eftir að hafa tapað fimm leikjum í röð með markatölunni 1-13 hafa Framarar snúið blaðinu við unnið tvo leiki í röð; 2-0 gegn Þór á útivelli og 1-0 gegn Fram á heimavelli.

Daði Guðmundsson, sem lék sinn fyrsta leik með Fram í efstu deild árið 1997, kvaðst bjartsýnn fyrir leikinn í samtali við Vísi í dag.

„Það er fínn andi í okkar herbúðum. Við höfum náð í góð úrslit í tveimur síðustu leikjum og ætlum að halda því áfram í kvöld,“ sagði Daði, en hvað hefur breyst hjá Fram í síðustu tveimur leikjum?

„Það er kominn smá stöðugleiki í liðið. Við höfum spilað með svipaða varnarlínu í tveimur síðustu leikjum og þétt okkur inni á miðjunni.

Orri Gunnarsson hefur verið mjög sterkur varnarlega inni á miðjunni og hann hjálpar vörninni mikið. Og svo hefur Denis (Cardaklija) staðið sig vel í markinu,“ sagði Daði, en við hverju býst hann af Breiðabliki í kvöld?

„Ég býst við hörkuleik. Leikir okkar og Blika á síðustu árum hafa jafnan verið hörkuleikir. Okkur hefur gengið vel gegn þeim fyrir utan bikarúrslitaleikinn 2009,“ sagði Daði, en Breiðablik bar síðast sigurorð af Fram í deildarleik árið 2008. Marel Baldvinsson skoraði þá tvö mörk og Alfreð Finnbogason eitt í 3-0 sigri Blika á Kópavogsvelli.

Framarar hafa verið í fallbaráttu síðustu ár og þekkja þá stöðu vel. Daði segir að það geti hjálpað liðinu í þeirri baráttu sem framundan er.

„Vonandi hjálpar það. Við erum reyndar með, þannig séð, nýtt lið, en við erum nokkrir sem höfum verið í þessari stöðu áður. Maður þekkir þessa stöðu einum of vel,“ sagði Daði léttur að lokum.


Tengdar fréttir

Umfjöllun og viðtöl: Þór - Fram 0-2 | Guðmundur Steinn með tvö

Framarar enduðu fimm leikja taphrinu sína í Pepsi-deild karla í kvöld með því að sækja þrjú stig norður eftir 2-0 sigur á Þórsurum í 14. umferð deildarinnar. Guðmundur Steinn Hafsteinsson skoraði bæði mörk leiksins á síðustu sextán mínútunum en bæði lið enduðu með tíu menn inn á vellinum.




Fleiri fréttir

Sjá meira


×