Lífið

Cumberbatch tók viðtal við Hiddleston: Skautaði fimlega fram hjá því að minnast á Taylor Swift

Sunna Kristín Hilmarsdóttir skrifar
Félagarnir Tom Hiddleston og Benedict Cumberbatch.
Félagarnir Tom Hiddleston og Benedict Cumberbatch. vísir/getty
Leikarinn Tom Hiddleston var nokkuð mikið í sviðsljósinu í sumar vegna sambands hans og söngkonunnar Taylor Swift. Þau fóru síst í felur með samband sitt og voru ítrekað mynduð saman af ljósmyndurum slúðurblaðanna. Þá birti vinkona Swift paramynd af sér og eiginmanni sínum á Instagram ásamt þeim Hiddleston og Swift og Blake Lively og Ryan Reynolds.

Sambandi Hiddleston og Swift lauk hins vegar síðsumars ef marka má erlenda miðla og þrátt fyrir gullið tækifæri spurði leikarinn Benedict Cumberbatch Hiddleston ekkert út í sambandið þegar hann tók viðtal við hann fyrir tímaritið Interview.

Leikararnir eru ágætis vinir svo það þarf kannski ekki að koma á óvart að Cumberbatch hafi ekki viljað spyrja Hiddleston út í samband hans við Swift í viðtali sem birt er opinberlega en það má segja að hann hafi skautað fimlega hjá málinu án þess að nefna Swift á nafn.

 

Cumberbatch minntist á það hvernig það er að vinna sem leikari, vera mikið í sviðsljósinu starfsins vegna, og hvaða áhrif það getur haft á einkalífið.

„Það er þetta með að af því að við erum mikið í sviðsljósinu vegna vinnunnar okkar, bæði í kvikmyndunum og þegar við erum að kynna þær, að þá heldur fólk einkalíf okkar eigi líka að vera undir smásjánni,“ sagði Cumberbatch.

Hann ýjaði síðan að sambandi Hiddleston við Swift.

 

„Án þess að ég ætli eitthvað að fara að ræða það þá vil ég bara segja að ég ætla ekki að spyrja vin minn persónulegra spurninga um einkalíf hans bara af því að það hafa verið birtar myndir, óumbeðið, af honum og ákveðnum einstaklingi saman eða í sambandi. Ég ætla ekki að fara út það svo þær dyr eru lokaðar kæri lesandi.“

Hiddleston á þá að hafa hlegið smá og þakkað vini sínum fyrir, en viðtalið í heild sinni má lesa hér.


Tengdar fréttir

Er Hiddleswift bara allt í plati?

Kenningar eru á lofti um að meint ástarsamband Taylor Swift og Tom Hiddleton sé í raun leikur á fjölmiðla sem tengist nýju tónlistarmyndbandi hennar.






Fleiri fréttir

Sjá meira


×