Cristiano Ronaldo skallaði Portúgal inn í undanúrslitin
-
MYND/AP
Cristiano Ronaldo er þar með búinn að skora þrjú mörk í síðustu tveimur leikjum og er heldur betur búinn að stimpla sig inn í þessa keppni. Portúgalir mæta annaðhvort Spáni eða Frakkland í undanúrslitunum en þau mætast á laugardagskvöldið.
Portúgalir fóru í gang í lok fyrri hálfleiksins og litu ekki til baka eftir það. Þeir voru í stórsókn stærsta hluta seinni hálfleiks og markið lá í loftinu allan hálfleikinn.
Liðin tóku ekki mikla áhættu í upphafi leiks og leikurinn var ekki mikið fyrir augað framan af. Tékkar héldu aftur af portúgalska liðinu fram eftir öllum fyrri hálfleiknum en Cristiano Ronaldo lifnaði við á lokakaflanum og fékk þá þrjú fín færi.
Hélder Postiga þurfti að fara meiddur af velli á 40. mínútu og Hugo Almeida kom inn fyrir hann. Almeida hafði góð áhrif á sóknarleik Portúgala og Ronaldo fékk besta færi hálfleiksins í uppbótartíma fyrri hálfleiks.
Ronaldo fékk þá flotta sendingu inn í teiginn frá Raúl Meireles en átti eftir að gera mikið áður en hann náði skoti sem small í stönginni. Tékkar sluppu þar með skrekkinn.
Portúgalir byrjuðu seinni hálfleikinn af miklum krafti og Cristiano Ronaldo átti skot í utanverða stöngina úr aukaspyrnu á 50. mínútu. Fjórum mínútum síðar spilaði Meireles Ronaldo enn á ný í færi en skot hans var misheppnað og fór langt yfir.
Portúgalir voru þarna búnir að taka algjörlega yfir leikinn. Petr Cech varði vel frá Nani á 58. mínútu og mark Hugo Almeida mínútu síðar var síðan dæmt af vegna rangstöðu.
Stórsókn Portúgala hélt áfram en Petr Cech var áfram vakandi í markinu. Hann kom þó ekki í veg fyrir frábæran skalla Cristiano Ronaldo ellefu mínútum fyrir leikslok.
Cristiano Ronaldo fékk þá frábæra fyrirgjöf frá Joao Moutinho og skoraði með föstum skutluskalla í jörðina og í markið, óverjandi fyrir Cech. Alvöru mark fyrir alvöru mann sem reyndist vera eina mark leiksins.
Þessi síða uppfærist sjálfkrafa á 30 sekúndna fresti
