Cher aflýsir tónleikum

Söngkonan Cher hefur neyðst til að aflýsa þeim tónleikum sem eftir eru af tónleikaferðalaginu Dressed to Kill.

Samtals hefur Cher þurft að aflýsa 29 tónleikum á tónleikaferðalaginu, en þeim fyrstu aflýsti hún í byrjun september vegna vírussýkingar.

Vonir stóðu til að Cher gæti klárað tónleikaferðalagið eftir að hafa tekið sér stutt frí en tilkynnt var í gær að vegna slæmrar eyrnasýkingar neyddist söngkonan til að aflýsa restinni af tónleikaferðalagi sínu.

Cher var skiljanlega miður sín yfir að þurfa að aflýsa tónleikunum og setti tilkynningu á samskiptamiðilinn Twitter þar sem hún bað aðdáendur sína afsökunar.