Enski boltinn

Carragher: Liverpool ömurlegt og fær á sig 50 mörk með þessu áframhaldi

Tómas Þór Þórðarson skrifar
Jürgen Klopp er í basli.
Jürgen Klopp er í basli. vísir/getty
Jamie Carragher, sparkspekingur Sky Sports og fyrrverandi leikmaður Liverpool, gagnrýndi Jürgen Klopp, knattspyrnustjóra liðsins, og leikáætlun hans harðlega eftir 3-1 tap Liverpool gegn Leicester í ensku úrvalsdeildinni í gærkvöldi.

Carragher finnst Klopp ekki vera búinn að læra af mistökum sínum eins og í leikjum á móti Burnley og Hull þar sem leikmenn á borð við Andre Gray og Oumar Niasse voru varnarmönnum Liverpool til mikilla vandræða.

Sjá einnig:Klopp: Slæm byrjun, slæmur miðkafli og slæmur endir

Jamie Vardy, sem var ekki búinn að skora síðan 10. desember fyrir gærkvöldið, skoraði tvívegis en fyrra markið skoraði hann eftir að fá sendingu í gegnum vörn Liverpool.

James Milner, sem hefur leikið í vinstri bakverðinum í vetur, og Lucas Leiva áttu erfitt upp dráttar og áttu stóra sök á fyrsta markinu en Carragher kennir Klopp um mistök þeirra þar sem þeir eru ekki að spila í sínum stöðum.

„Liverpool var ömurlegt í kvöld. Ég var á leikjunum á móti Hull og Burnley og þeir voru alveg eins. Liverpool fær á sig 50 mörk með þessu áframhaldi og Klopp hefur ekkert gert til að laga þetta,“ sagði Carragher eftir leikinn í gærkvöldi.

„Það er ekki séns að þú vinnir eitt né neitt með því að fá á sig svona mikið af mörkum,“ sagði Carragher en Liverpool er búið að fá á sig 33 mörk, mest allra af efstu sex liðum deildarinnar.

Sjá einnig:Vardy: Shakes bað mig um að spila hærra uppi á vellinum

„Annað sem truflar mig varðandi Liverpool er að það spilar alltaf eins. Það sem er að hjá liðinu er að það mætir leikmönnum eins og West Morgan og Robert Huth og leyfir þeim að hafa boltann. Svo vita allir að Vardy vill hlaupa fyrir aftan vörnina þegar Liverpool getur sótt hratt með Sadio Mané.

„Það er alltaf sami hluturinn sem gerist hjá Liverpool. Fyrr á leiktíðinni var það Gray sem stakk sér inn fyrir vörnina, svo Niasse og nú Vardy. Leikáætlun Klopps breytist ekkert. Hann hefur of mikla trú á sumum leikmönnum. Hann verður að gera breytingar í sumar,“ sagði Jamie Carragher.


Tengdar fréttir




Fleiri fréttir

Sjá meira


×