Búist við metfjölda á Þjóðhátíð

Stærsta ferðamannahelgi ársins er gengin í garð. Búist er við að Þjóðhátíð í Eyjum verði sú fjölmennasta til þessa. Umferðarstofa biður ökumenn að sýna tillitsemi og aðgát. Veðurspáin fyrir landið er hin besta.

Búist er við því að Þjóðhátíð Vestmannaeyinga um helgina verði sú fjölmennasta í manna minnum og er hún haldin í 130. sinn í ár. Eins og kunnugt er var hin nýja Landeyjahöfn vígð nú á dögunum og ferð Herjólfs milli lands og Eyja styttist um tæpa tvo klukkutíma en ferjan siglir sex til átta ferðir á sólarhring yfir verslunarmannahelgina. Uppselt er í Herjólf frá föstudegi til mánudags og öll flug til og frá Eyjum uppbókuð. Elliði Vignisson, bæjarstjóri í Vestmannaeyjum, segir viðbúnað í Herjólfsdal hafa verið aukinn til muna fyrir helgina og menn séu að búa sig undir stærstu Þjóðhátíð til þessa.

„Við höfum verið að undirbúa þessa hátíð frá því að við slitum þeirri síðustu," segir Elliði. „Það lá mjög snemma fyrir að það stefndi í stóra hátíð, fyrst og fremst vegna þess hversu góð sú síðasta var og þess vegna hefur allur aðbúnaður og þjónusta við gesti verið stóraukið."
Fjölskylduskemmtanir eru áberandi í ár, en þær er meðal annars að finna á Stokkseyri, Akureyri, í Stykkishólmi og Borgarnesi. Veðurspáin fyrir helgina er svipuð fyrir allt landið og lítur út fyrir að hitinn verði á bilinu 12-17 stig á landinu, en svo virðist sem hlýjast verði á Suður- og Vesturlandi.

Verslunarmannahelgi er haldin hátíðleg á undan frídegi verslunarmanna, fyrsta mánudegi ágústmánaðar hvers árs. Frídeginum var komið á af Verslunarmannafélagi Reykjavíkur og var í fyrsta sinn haldinn hátíðlegur í Reykjavík þann 13. september árið 1894. Dagurinn var síðar færður fram í byrjun ágúst. Hefur helgin á undan frídegi verslunarmanna ávallt verið mikil ferðahelgi og hefur skapast hefð fyrir mörgum árlegum viðburðum eins og finna má á landinu öllu um helgina. sunna@frettabladid.is