Tíska og hönnun

Búa til tísku­vöru úr aust­firsku hrein­dýraleðri

Ragnheiður Tryggvadóttir skrifar
Elísabet Karlsdóttir og Ágústa Sveinsdóttir skipa hönnunarteymið Alvöru. Þær frumsýndu nýja línu úr hreindýraskinni á dögunum.
Elísabet Karlsdóttir og Ágústa Sveinsdóttir skipa hönnunarteymið Alvöru. Þær frumsýndu nýja línu úr hreindýraskinni á dögunum. Mynd/Ragna Margrét Guðmundsdóttir
Hönnuðirnir Elísabet Karlsdóttir og Ágústa Sveinsdóttir skipa þær hönnunartvíeykið Alvöru. Þær frumsýna fatnað og fylgihluti úr leðri í línunni Useless.

„Useless er lína úr austfirsku hreindýraleðri sem er væntanleg á markað á næsta ári,“ útskýrir Elísabet Karlsdóttir fatahönnuður en hún skipar hönnunartvíeykið Alvöru ásamt vöruhönnuðinum Ágústu Sveinsdóttur.

Í hönnun sinni leitast þær við að skapa nýjar og tilraunakenndar leiðir í efnisnotkun og horfa ekki einungis í notagildið heldur einnig í það hvaðan efnið kemur og hvernig það verður til.

Innblástur línunnar er fenginn frá afslappaðri götutísku nútímakvenna sem kjósa að hafa þægindin í fyrirrúmi.mynd/Anna Maggý
„Hreindýraleður er hráefni sem hefur verið notað lengi á svæðinu fyrir austan, en ekki í þessu samhengi. Við erum að búa til tískuvörur og leggjum áherslu á hráefnið sjálft,“ útskýrir Elísabet. 

Hún segir þær Ágústu vilja með þessu vekja athygli á íslensku hráefni og meðal annars hreindýraleðri. Fram að þessu hafi það einungis verið nýtt að hluta og mikið af skinnum fari til spillis þar sem þau séu aukaafurð af veiðum.

„Það kveikti í okkur Ágústu að vinna með það en markmið verkefnisins er að skapa framleiðslumöguleika með sjálfbærni að leiðar­ljósi. Þá eru skinnin öll svo ólík af villtum dýrum sem er skemmtilegt og verður hluti af hönnuninni. Það flækir að sjálfsögðu hönnunarferlið að vinna með efni sem ekki er hægt að kaupa úti í búð.

Við nálgumst skinnin í samvinnu við fólk fyrir austan sem safnar þeim saman fyrir okkur. Skinnin eru send í sútun á Sauðárkróki, einu sútunarverksmiðju landsins. Það má því segja að verkefnið sé líka samfélagslegt, við erum í samstarfi við fólkið á svæðinu og viljum vinna með það sem hægt er að gera á Íslandi,“ segir Elísabet.

„Hreindýraleður er hráefni sem hefur verið notað lengi á svæðinu fyrir austan, en ekki í þessu samhengi.“Mynd/Anna Maggý
Useless er annað samvinnuverkefni þeirra Ágústu og Elísabetar en áður höfðu þær unnið að skartgripalínunni Silfru sem þær sýndu á HönnunarMars á þessu ári. Þær fengu styrk úr Hönnunar­sjóði til frekari þróunar á þeirri línu en silfrið í línunni er steypt í vatni.

Von er á Silfru á markað á nýju ári.

„Useless og Silfra eiga það sameiginlegt að vera unnin út frá hráefninu,“ segir Elísabet.

Um helgina fór fram sýning á Useless í formi innsetningar þar sem hönnun, ljósmyndir og vídeó mætast í einni heild. Einnig var gefið út zine (smátímarit) í takmörkuðu upplagi sem allir sýningar­gestir fá að gjöf.

Nánar má forvitnast um hönnun Alvöru á alvarareykjavik.is.

„Markmið verkefnisins er að skapa framleiðslumöguleika með sjálfbærni að leiðarljósi.“

Tengdar fréttir






Fleiri fréttir

Sjá meira


×