Lífið

Brögðuðu eina sterkustu sósu heims: „Vorum þunnir eftir þetta“

Jóhann Óli Eiðsson skrifar
Það þarf aðeins nokkra dropa af sósunni til að fá nóg.
Það þarf aðeins nokkra dropa af sósunni til að fá nóg.
„Þetta er búið að vera í gangi í tvö ár,“ segir Tómas Þorlákur Guðmundsson, yfirleitt kallaður Tommi Þ, en hann ásamt vinum sínum stendur á bak við Youtube síðuna Experimental Viking.

Í nýjasta myndbandi strákanna prófa þeir lið sem kallast Spin The Hotsauce. Reglurnar eru einfaldar. Þeir sitja í hring og snúa flösku af sterkri sósu. Sá sem flaskan lendir á verður að bragða hana nema í fimmta hvert skipti má sá sem flaskan lendir á velja einhvern annan til að bragða sósuna.

„Ég var úti í Bandaríkjunum og sá búð sem seldi eingöngu sterkar sósur. Þessi var nýkomin í búðina og þeir sögðu að hún væri sú sterkasta sem þeir ættu. Það endaði svona.“ 

Sósan sem varð fyrir valinu kallast Flashbang. Scoville kvarðinn hefur verið notaður til að mæla styrkleika ýmissa pipra og skorar sósan um 3.5 milljónir á þeim kvarða. Til samanburðar skorar jalapeno um 5.000 og piparsprey, sem lögreglan notar, um fimm milljónir.

Tommi segir að þessi kvöldstund hafi verið afar áhugaverð. Eftir að hafa prófað sósuna hafi þeir endað allir slefandi og borðað ís og drukkið mjólk til að koma jafnvægi á á nýjan leik. „Við enduðum í raun þunnir að gera sem minnst.“

„Ég hitti Gústa úr myndbandinu fyrir skemmstu. Hann hafði farið og fengið sér piri piri kjúkling um daginn sem honum þótti eitt sinn ægilega sterkur. Eftir að hafa bragðað þessa sósu þótti honum hann nánast bragðlaus,“ segir Tommi.

Myndbandið má sjá hér að neðan og Facebook síðu þeirra má skoða hér.






Fleiri fréttir

Sjá meira


×